Ayiti-Dominikani/Kilti: Virewon pou Vanessa Jeudi ak gwoup AZUEÏ nan kad pwojè binasyonal ki rele KISKEY’ART.
Okay , 9 jen 2022
Atis angaje, Vanessa Jeudi pral pase prèske yon mwa deyò nan kad yon kolaborasyon ak gwoup AZUEÏ nan yon pwojè binasyonal ki pote non KISKEYART. Virewon sa a ap dewoule soti vandredi 10 la pou rive 26 jen 2022 a. konsè, atelye, konferans, seyans grafiti, elatriye sou tout zile a se kèk pami aktivite k ap gen nan dewoulman aktivite yo.
https://fb.watch/dyrQgMZpQ3/?mibextid=y5Hli4
AZUEÏ se yon mouvman ki reyini plizyè atis angaje ayisyen ak dominiken. Li pran nesans nan lane 2015 bò lak Azueï ant Jimani ak Malpas. Objektif la se mete fòs yo ansanm pou dekonstwi diskou divizyon ak layèn ki egziste nan politik 2 peyi yo atravè mizik ak lòt zèv atisti. Se yon fason pou ofri yon lòt vwa, yon lòt chemen ak nouvo jenrasyon 2 peyi yo. Mizik, grafiti, literati ak aktivism se prensipal zam yo itilize pou pouswiv tras zansèt yo genyen ankomen pou chèche konnen pi byen orijin yo. Ou ka gade videyoAzueï GuaGuaTapTap nan lyen sa :https://www.youtube.com/watch?v=JMJh9hBMMnw
Atis/ militan Vanessa Jeudi angaje li nan batay pou byennèt mas yo sitou fanm yo nan katye popilè yo, milye riral yo ak fanm nan faktori yo. Li te pral relanse karyè mizik li nan fen lane 2021 an ak yon mizik ki rele “Limyè” ki chante lespwa pou pèp ayisyen an ki ap travèse yon moman nwa. Nan mwa novanm 2021 pase a li te jwe yon konsè nan Yanvalou. Diva mizik ayisyen an pataje plizyè sèn dènye tan sa yo. Li pral gen pou l pèfome an Lead pandan tout toune a ak gwoup Azuei, kote l ap gen pou chante plizyè mizik sou albòm “Artybonito” a ki se dènye pwojè mizikal gwoup AZUEÏ. Ou ka gade vesyon akoustik “Limyè” Vanessa Jeudi nan lyen sa a: https://www.youtube.com/watch?v=xtXTjxFySmQ
Vanessa Jeudi ranplase nan inisyativ sa a Shoomy ki te gen pou patisipe nan virewon an men ki pa disponib akòz li se nouvo chantèz gwoup zenglen.
Pou vanessa se pral yon adaptasyon fasil paske se menm enspirasyon yo, menm reyalite a, se menm angajman yo. Aktivite sa yo pral dewoule nan divès vil sou zile a tankou : Pedènal, Ansapit, Tamayo, Limonad, Okap, Cabarete, Santiago, San Pedro de Marcoris ak Santo Domingo.
Radyo Tele Montagna, swete bon siksè ak Diva nasyonal la Vanessa Jeudi pandan toune sa a.
Franndy Lesperance
