Pa gen twòp enfòmasyon sou sa Lapolis ta jwenn nan debri ti avyon prive ki lakòz 2 pilot mouri, daprè yon sous kominotè ki te enfòme sal nouvèl radyo Montagna nan lè midi konsa jounen jedi 3 oktòb 2024 la.
Okay, jedi 3 oktòb 2024
Guy Emmanuel St Amour ak Hans Codio Blaise se non 2 pilòt Ayisyen ak Ayisyen/Ameriken ki pèdi lavi yo nan aksidan ti avyon prive N4104EC ki t ap transpòte zangi, daprè yon sous nan PNH/ Sid la.
Daprè kèk moun nan zòn lan ki reponn kesyon radyo Montagna di avyon an pa t ap vole twò wo epi li t ap fè yon gwo bri dwòl fòse l ateri nan lakou sa a kote moun nan lokalite Mizèn, 5kyèm seksyon komin Okay, pa t pran tan pou rive nan lye a kote yo konstate kò pilot kwense andedan avyon an. Enfòmasyon yo fè kwè se ant 2 ak 4 minit apre avyon an fin dekole nan ayewoga Antoine Simon an li tonbe.
Kèk minit apre, divès inite tankou BLTS nan PNH la , Pwoteksyon Sivil, sèvis Ponpye Meri Okay la te monte al deboure nan debri yo pou yo ta jwenn kèk endis ki te ka gide yo nan ankèt yo ta dwe pral mennen pou detèmine kisa ki rive epi sekirize espas la san sekirize l paske anpil moun te gentan anvayi espas la. Aprè konsta legal Jijdepè Titilè komin Okay la, Paul Tarte, kadav yo te leve san bay presizyon ki kote yo ye. Otorite yo pa kominike twòp enfòmasyon bay laprès. Pa gen espètiz pou sa.
Se pa premye aksidan sa yo ki pase nan komin Okay la kou avyon sispèk ki konn abandone. Men pou jan trafik avyon ak elikoptè ap ògmante nan divès rejyon peyi a, Depatman Sid anpatikilye si pa gen plis kontwòl sou fason avyon ap vole nan peyi a kenpòt lè ap gen yon gwo dram nan peyi a.
Aktivite Zangi sa pou anpil moun gen ramifikasyon l ak anpil lòt aktivite louch anndan peyi a, pandan Leta a fenk koumanse fèmen je l pou l pa deranje gwo babin yo.
Max – Imbert Marcelin ( Maks – Enmbèr Marslen)
RTM
