Òganizasyon Pèp k ap Lite, (OPL) nan nivo nasyonal andèy apre lanmò briksoukou Sekretè Jeneral annaprè komite Nasyonal la , Maner Cabée, madi 18 jiyè 2023 nan yon lopital nan 3zyèm vil peyi a.
Okay 19 jiyè 2023
Reyaksyon pa manke rive jwenn sal nouvèl RTM lan aprè disparisyon sanzatann militan politik, manm òganizasyon popilè nan komin Okay la. Òganizasyon dwa moun, RSDDH, anseyan, militan politik, DDS/ Komès la, zanmi, regrèt depa anvan lè konbatan an.
Daprè enfòmasyon yo, Jounalis/ anseyan an, ansyen grefyè nan pakè jiridiksyon Okay la viktim ak yon kriz tansyon (AVC) nan maten madi 18 jiyè 2023 a. Kouri nan lopital ak li, li rann dènye bout souf li bò 11zè 30 nan aswè selon Thomas Thélusma ansyen MJOPL, kamarad politik li ki reponn kesyon radyo Télé Montagna kèk èdtan aprè disparisyon rapid sa a.
Nan dèyè lane sa yo, militan politik la, manm CFOS, te toujou nan tout manifestasyon k ap mande pou dwa sitwayen yo respektè sou tout plan. Militan an pa t manke denonse koripsyon, mande pou yon Leta san fòs kote tabli, batay kont enjistis ak represyon, pou demokrasi tabli… Disparisyon sa a se yon gwo pèt pou Depatman Sid la, peyi a anjeneral paske se yon jenn gason ki t ap batay daprè manm Fòs Pèp la, Karvens Laguerre.
Anseyan Cabée mouri ak laj 50 lane. Depi plizyè mwa li t ap soufri ak yon tansyon ki t ap fatige l. Militan an mouri kite madam, 2 pitit li yo, kamarad militan nan òganizasyon tankou CFOS ak pati politik li, « Organisation Peuple en Lutte » ( OPL) zanmi li yo nan gwo lapenn. Li gen plis pase 20 lane ap milite nan pati politik la.
Max – Imbert Marcelin ( Maks – Enmbèr Marslen)
