Atravè listwa, richès peyi oksidantal yo soti nan move zafè, vòl ak piyaj yo reyalize sou peyi depandan nan lemond. Yo te òganize gwo kwazad pou fè moun tounen esklav, fè yo travay pou anyen, vann yo kou zannimo pou fè lajan. Peyi Ewòp yo ki te gen pi gwo zam, pral soumèt anpil pèp sou latè anba esklavaj, gras ak yon vi chen manje chen yo te enstale sou tout Limanite. Ositou kòm mwayen defans pèp sou kontinan afriken an te pi fèb, yo pral plis viktim anba men bouro yo, pou kite anpil move konsekans sou ekonomi ak devlopman sosyete afriken yo, paske depi tan esklavaj pwisans piyajè yo pajanm sispann souse manmèl peyi domine yo.  Sepandan depi kèk tan, moun remake peyi viktim yo ap souke kò yo pou revandike sèten dwa ke peyi kolonyalis yo bafwe. Tout kote, pèp yo ap reklame souverènte peyi yo, pou yo jwenn okazyon pran desten yo anmen. Konsa, se tout mizanplas politik ak ekonomik ki te fèt anndan sistèm èksplwatasyon an, anfavè peyi mafya yo ki ankoz. Lide k ap domine mond lan ap sekwe, van sanble pran wout poul chanje direksyon nan mond lan tout bon vre.

Depi plizyè dizèn lane, moun avize ap obsève yon kouran nasyonalis k ap travèse anpil kote nan mond lan. Anpil Mouvman “souverainiste” souvrenis ap pran pye toupatou;  an Ewòp, an Afrik tankou nan amerik latin nan kote y ap reklame dwa pèp yo pou deside sò peyi yo, andeyò tout enfliyans gwo miltinasyonal ki anba chapo sistèm mafya entènasyonal la. Yo tout ap reklame yon politik nasyonal rijid ak yon vizyon pou defann enterè nasyonal yo. Sou kontinan afriken kote Mouvman Panafriken an pran chè, reklamasyon yo pran yon karaktè rejyonal, e revandikasyon k ap degaje yo, pran vitès yon siklòn ki gen tandans chavire totalman kabwèt sistèm dominasyon kolonyalis oksidantal la. Nan amerik latin, volonte pèp yo pou aji ansanm nan menm direksyon, bay aksyon politik yo anpil fòs paske gen rezon taktik e stratejik ki èksplike desizyon sa, e rezilta sou teren politik yo bay lidè nan zòn yo rezon sou pwen sa. Regwoupman rejyonal yo ranfòse batay la,  li jennen aksyon reprezay kriminèl yo e li fasilite konsyans kolèktif pran jarèt anndan sosyete yo. Fòm batay sa nouvo pou peyi dechèpiyè yo ki pa anmezi idantifye lènmi pou yo frape, paske pèp k ap goumen dèyè enterè nasyonal yo, ap evolye nan yon lòt teren politik parapò ak zatrap eleksyon ki se yon espas pou distribye pouvwa, kote tandans lan toujou divize sosyete yo. Konsa, priz konsyans kolektif sa koz Eleksyon pikekole yo pèdi enpòtans, e pye kolonyalis yo kole nan zatrap tradisyonèl la ke yo toujou voye nan kou pèp domine yo. An 2018, pèp ayisyen an antre nan  mobilizasyon pou defann dwa granmoun peyi a, devan desizyon Etazini ak Core-Gwoup te pran pou inyore egzistans yo, lè yo te nome Jovnèl Prezidan ak fòs ponyèt yo nan komedi elektoral 2016 la. Nati revandikasyon yo menmjan ak sa k ap pase  lòt kote nan mond lan, rive montre kouman peyi kolonyalis yo konstwi dominasyon yo sou blòf ak mansonj. Donk pawòl pwomès devlopman ak demokrasi ki toujou nan wout pou l pajanm rive a pa alamòd, oksidan oblije parèt tout kò l e pèp la wè yo toutouni. Se pou tèt sa, mas pèp ayisyen an mande chanjman pou l gen souverènte peyi yo paske zak mafya entènasyonal la sou teren an pa enspire konfyans. Sepandan pou kenbe mobilizasyon an djanm nan dengonn yo, gen lòt travay ki dwe kontinye fèt nan mitan mas popilè yo. Tout kote nan peyi a, konsyans mas yo dwe klè sou nesesite ki genyen pou pèp la batay pou souverènte a, paske se yon kesyon nasyonal fondamantal, pou kenbe mafya entènasyonal la lwen tout desizyon vital pou peyi a.

Kidonk se toupatou koze mondyalizasyon, politik baryè lib san limit la ap fè bak. Lide pou se yon oligachi mondyal ki dwe pran kontwòl tout richès Limanite a, atravè politik neyoliberal la fè fon, paske pèp tout kote konprann jwèt la. Yo pran lari pou denonse ekip mafya entènasyonal la, ki vize anfonse pèp yo toupatou nan povrete ak lanmizè nan enterè oligachi mondyalis la. Nan Afrik, nan Amerik Latin kòm nan Mwaryen-Oryan, pèp yo nan batay pou souverènte politik ak ekonomik yo. Menmlè yo kwaze ak anpil difikilte nan chimen yo, travay la ap vanse nan anpil zòn. Nan teritwa libere kote pèp yo gen viktwa, desizyon politik ak ekonomik ki rive pran andeyò volonte ak dikte ekip mafya entènasyonal la, fè gwo diferans nan je tout moun. Piyajè yo panike, yo poko jwenn lòt manti ak mezi pou machin vòl la repedale. Lakay malgre mobilizasyon pèp la, sistèm mafya toujou gen kontwòl peyi a, paske  kontrèman ak lòt kote yo, Mouvman Rezistans ayisyen an rete izole parapò ak dinamik leve kanpe k ap fèt nan mond lan. Se pou tèt sa, pwogresis ayisyen jwenn yo anfas yon nesesite pou chache konekte ak pwogresis toupatou k ap defann souverènte peyi yo, paske solidarite a pral fondamantal  pou mas popilè ayisyen yo rapouswiv batay la. Donk patriyòt ayisyen yo dwe kontinye travay nan mitan mas yo, pou souverènte peyi a parèt nan tèt lis revandikasyon pèp la sou beton an. Konsa, kondisyon ap reyini pou solidarite lòt pèp toupatou vin ride Mouvman Rezistans ayisyen an jwenn bout mafya entènasyonal la nan peyi a.

Viv Mobilizasyon Pèmanan Pou Pwojè Nasyonal La!

Viv Inite Popilè Dèyè Souverènte Peyi a!

Libète ou Lanmò.

Vwa Rezistans Popilè No75

Komite Rezistans Popilè Benwa Batravil, KRPBB.