Komisè gouvènman jiridiksyon Okay la arete epi mete nan gadavi Robert Brenton, yon Sitwayen ameriken pou enjerans nan zafè peyi a. Yon sitiyasyon ki pwovoke kòlè plizyè kanmarad konba li nan twazyèm vil peyi a.
Okay 5 jiyè 2023
Sitwayen etranje sa a rele Robert Brenton Nutter. Li gen plis pase 10 lane ap viv nan Sid peyi a, komin Okay, jwenn arestasyon l aprèmidi madi 4 jiyè 2023 a, zòn lwès sant vil la.
Daprè enfòmasyon yo, se ekip ame jal komisè jiridiksyon Okay la, Ronald Richemond, ki arete l kòm moun k ap foure bouch li nan zafè peyi a epi ap twouble lòd piblik. Malere a fèmen nan komisarya Okay la ap tann dizon lajistis.
Nan dènye jou sa yo, Bob konn douvan swa apye oubyen sou yon zopope moto ap patisipe nan manifestasyon plizyè òganizasyon lanse pou mande MTPTC ranje twonson wout Tòbèk la epi rele aba mòd Leta reyaksyonè a ak tout otorite ki nan tèt li epi Bwa Kale pou yo.
Pou kèk nan òganizatè dènye manifestasyon ki te fèt nan vil la, vandredi 30 jiyè 2023 pase a, pwotestatè a te la ak yo. Kòm malere ki abite nan komin la, Robert Brenton konsène ak move eta twonson wout Okay – Pòsali a kou dividal lòt pwoblèm k ap trakase peyi a. Arete l sou baz enjerans se pito machin represyon an reprezantan gouvènman ap fè woule yon fason pou arete lòt moun k ap manifeste oubyen touye yo.
Pou Karvens Laguerre, Bob pa nan yon òganizasyon fiks. Li pote kole ak Fòs Pèp kou Platfòm VDH. Pou li arestasyon an ilegal. Yo pote tout sipò yo ba l nan moman difisil sa a. Yo mande liberasyon l san kondisyon.
Daprè avoka militan Maxon Esta ki reponn kesyon radyo Montagna, li pa konprann chaj fantezis k ap peze sou tèt sitwayen etranje a.
Pou mèt la, Robert Brenton pa yon reprezantan yon lòt peyi oubyen se pa yon manm yon òganizasyon entènasyon donk konsèp enjerans lan pa kenbe. Se yon sitwayen entranje ki fè yon konsta epi deside jwè wòl sitwayen responsab li. Pou kesyon twouble lòd piblik la, mèt la di se pa ak zam sitwayen an konn manifeste. Se ap bouch li oubyen yon pankat nan men ap rele Bwa Kale kou Komisè a pa sispann repete l.
Chèf pakè Okay la rale atik nan manman lwa peyi a ak mete gwo dosye sou tèt sitwayen yo pou anpeche yo kontinye mobilize men pase lòt atik nan konstitisyon an anba pye lè sitwayen yo ap mande aplikasyon yo nan domèn Anviwonnman ak Sosyal.
Maks – Enmbèr Marslen
RTM
