Peterson Gerard se non yon jenn plantè diri ki mouri anba bal yon polisye ayè mèkredi 4 janvye 2023 a, bò inè konsa sou abitasyon kay « Numa » nan zòn plenn Kolèt, premye seksyon komin Okay.
Okay, 5 janvye 2023
Kòdonatè Mobilizasyon Peyizan San Tè Sid (MOPSATES), Jean Gabard Jeudi ki reponn kesyon radyo Montagna, di se bò inè 15 konsa, plantè nan Asosyasyon Peyizan Plantè Kolèk (APPLAKOL) t ap òganize yon aktivite Konbit pike diri lè polisye Senel Morose aka Big ansivil – abiye ak yon bout pantalon nwa, yon mayo blan ak kach nen pou maske vizaj li te voye sekretè l, Bernard Nonçent vin agase peyizan yo anvan li te rejwenn li ak yon bakòp UDMO ki te gen 6 polisye ladan l.
Daprè sa kòdonatè a rekeyi nan men temwen yo, polisye prezime asasen an rejwenn Bernard ki te nan bouch louvri epi l pete bal. Viktim lan resevwa yon bal nan nivo lestomak ki touye l sou plas.
Apre konsta legal jijdepè Ligondé ak grefye l anprezans jal Komisè gouvènman jiridiksyon Okay la, mèt Ronald Richemond te otorize fanmi viktim lan pou leve kadav la.
Peterson Gerard se manm Asosyasyon Peyizan Plantè Kolèt, epi se mizisyen bann rara a, li ka gen 30 lane konsa. Li mouri Kite 4 timoun ladan yo yon tibebe yon mwa.
Se toutan, peyizan yo nan zòn Ditrich, plenn kolèt ap sibi egzaksyon grandon yo ki voye sekretè, lapolis kou pakè jiridiksyon Okay la pou degèpi yo sou tè agrikòl y ap travay yo. Men fwa sa yo touye yon peyizan pou yo.,
Mobilizasyon Peyizan San Tè Sid (MOPSATES), ak Asosyasyon Peyizan Plantè Kolèt (APPLAKOL) ap mande pou lajistis arete polisye Senel Morose aka Big ak sekretè l Bernard Nonçent. Yo ap mande jistis ak reparasyon pou fanmyi mò a epi pou lajistis kanpe machin represyon an ki pa sispann kouri dèye peyizan pou kite lespas tè agrikòl yo pou yo ka vin ranbleye anba beton jan sa ap pase anpil kote nan Depatman Sid la.
Max – Imbert Marcelin ( Maks – Enmbèr Marslen)
RTM
