Yon nouvo komisè gouvènman nan tèt Pakè Okay, yon twazyèm apre Jal komisè Richemond
Sal odyans prensipal Palè Jistis la plen kou yon ze ak otorite sivil, polisye, Majistra, avoka, zanmi, fanmi ak kirye ki vin asiste tout yon seremonyèl pou mèt Elioth Pierre Paul vin pran fonksyon l Kòm nouvo komisè nan jiridiksyon Okay la.
Okay 6 novanm 2024.
Levit koulè ble atire sou nwa, chemiz blan ak kòl wòz pal, chita nan mitan sal odyans lan, mouche Pierre Paul t ap tann lè pou l al leve men dwat li pou l sèmante l ap respekte Konstitisyon an, lwa yo epi l ap mennen bak li kou yon bon Majistra ki respektè tèt li.
Sou papye wi, lwa yo kou konvansyon yo debou men nan pratik, pawòl sa yo pran lyann paske ajisman twaka Majistra sa yo – chita kou debou- toujou pase anba pye manman lwa peyi a epi ap fè tout sa lalwa pa ba yo dwa pou yo fè.
Pou kèk avoka, pa gen okenn pwoblèm pou yon Komisè parachite nan jiridiksyon Okay la. Gwoup avoka sa a panse se pa fè komisè Jean Joubert Amazan pa ta fè travay la, men aprè plis pase 4 lane anba dominasyon Jal komisè Ronald Richemond, li do santi l enkonfòtab. Tout avoka ki reponn kesyon radyo Montagna di y ap tann pou yo wè èske nouvo komisè a ap pran menm wout ak jal Komisè sanksyone a, Ronald Richemond ki te konpòte l kòm yon toupisan epi fè Pakè a tounen yon mache nan jan jistis la te konn ap negosye, monte gwoup avoka pa l ki te gen antre ak soti nan Pakè Okay la odetriman yon lòt gwoup.
Sitiyasyon sa te pouse lòd avoka yo nan Okay , nan dat 23 me 2022 pran yon rezolisyon kote yo pa rekonèt otorite Ronald Richemond pou ajisman l kou enplikasyon li nan kèk dosye louch ak entèdi avoka yo sou pèn sanksyon si yo ale douvan l. Men se te san rezilta. Paske gen plizyè avoka ki pa t fè ka ak rezolisyon an te kontinye al pase dosye jiskaske ansyen Batonye Evald Suplice kèk mwa apre ekri Dwayen an Tribinal Premye Enstans pou anonse l konsèy lòd la kanpe sou kòd rèd la, mande yon trèv san avi rès konsèy la. Kòm konsekans 4 avoka nan konsèy la te demisyone yon fason pou dezavwe desizyon Batonye a, Evald Suplice.
Pou kèk lòt, chèz mizikal la sispann woule. Minis defakto Carlos Hercule pran yon lòt koub nan montre kanpe lwen Ronald Richemond efektif menmsi anpil lòt ap tann lèt revokasyon fòmèl ansyen chèf jiridiksyon Okay la, se ka SOS Jounalis.
Depi lèt Ministè Jistis ak Sekirite Piblik la (MJSP) nan dat 27 jen 2024 pase a, sa fè yon 3 zyèm komisè ki nonmen nan tèt jiridiksyon an apre rèy Ronald Richemond ki sot pase 5 lane ap mennen san rezilta klè pou avansman lajistis nan Okay. Olye sa, jistis la trennen nan labou jouk Ministè a sanksyone ansyen komisè a pou prezime enplikasyon l nan sasinay yon jounalis, Garry Tesse.
Pou reprezantan Òganizasyon dwa moun yo, « kantite moun ame nou wè ki nan do nouvo komisè a, se nik yon pyon k ap deplase. Se menm tèt la, menm peny lan k ap pase pran cheve, anyen serye p ap rive », selon Jean Bénissél Belas. Pou esperans, li tande komisè a di li vin konbat ensekirite nan kesyon tè, detansyon prevantiv, UFADESH ap tann.
Rale komisè vin Okay pa nouvo. Men okenn pa fè mye ke rabese fonksyon an. Soti sou Léonor Julien tonbe sou Jean Alix Civil, rive sou Yon Pradel,lè se pa bawo a ki fèmen pòt sou yo se Konsèy Siperyè Pouvwa Jidisyè a ki revoke yo men yo toujou ap wode nan sistèm jistis pouri a.
Max – Imbert Marcelin ( Maks – Enmbèr Marcelin )
