Yon moun mouri, plizyè lòt soti blese anba bal Lapolis nan blòk kafou Boyer, mèkredi 14 septanm 2022 a anreprezay pou yon polisye kèk moun ta atake bò yon barikad daprè enfòmasyon yo. Aksyon sa rive nan kad mouvman leve kanpe kont lavi chè, grangou, ensekirite, monte gaz ak depa Premye Minis dafakto Ariel Henry nan tèt peyi a ki lanse depi plis pase 3 semèn nan vil Okay ak rès peyi a.
Okay 15 septanm 2022
Yon jenn gason mouri, Jimmy Samedy, 3 lòt blese nan zèpòl, nan janm, yon polisye blese nan pye, yon moto boule se bilan deblozay ki pete nan kafou Boyer ant Avni katajena ak ri Jeneral Maryon, ayè mèkredi 14 septanm 2022 a, bò 9vè konsa nan aswè.
Selon enfòmasyon yo, se yon polisye ki t ap sot travay ki tonbe nan barikad sitwayen yo nan zòn lan te fè ak fil kawotchou pou pwoteste kont move lavi ak pou rejim phtk 3zyèm vèsyon kite pouvwa a. Rive sou Barikad la, polisye a ta sanble pran nan fil la kote l tonbe atè epi nan kouri pou te evite l viktim anba kout wòch, blese nan pye daprè kèk temwen ki reponn kesyon radyo Montagna maten jedi 15 septanm 2022 a.
Polisye viktim lan te retounen nan komisarya ak konkou lòt sitwayen ozalantou a. Kèk minit aprè lapolis, nèg ak bout pantalon an sivil, gwo zam nan men yo pral debake, simaye gaz devan dèyè ak bal ki lakòz plizyè moun viktim. Pase nan sal ijans lopital la, yon pèsonèl medikal di nou yo te resevwa 2 blese yè swa, youn nan janm, lòt la nan nivo zèpòl li. Nou te konstate sila ki blese nan janm gòch li a te kouche sou vant ak yon banday elastik (emostaz, nan jagon medikal la) ap tann radyo grafi pou plis detay.
Pou jounen manifestasyon mèkredi 14 septanm lan, menm jounalis pa t epanye anba represyon ajan lòd yo ki maspimen sitwayen yo anba baton, arete yo ak pete bal kou gaz lakrimojèn pou te reprimande mouvman sitwayen yo nan 3zyèm vil peyi a.
N ap raple nouvo delege depatmantal Sid la, Ketnor Estinvil te pwomèt pa gen okenn moun k ap vin bloke lari nan twazyèm vil peyi a toutan li la. Se menm diskou sa a Komisè Gouvènman jiridiksyon Okay la, Ronald Richemond adopte kote li fè konnen li p ap tolere okenn moun vin bloke lari pou manifeste. Anpil obsèvatè krent pou lapolis nan vil Okay pa transfòme kòm yon veritab kò tonton makout.https://radiotelemontagna.com/yon-enstalasyon-politik-anba-chapo-represyon-nan-okay-pou-joseph-ketnor-estinvil/
Maks – Enmbèr Marslen
