Touche nan zòn vital li yo: pwatrin, salyè ak nan tèt, mari a pa t ap ba fanm lan chans menm pou l viv daprè kèk responsab dwa moun ki reponn kesyon radyo Montagna sou gwo zak sasinay sa ki fèt nan lannwit samdi 21 pou louvri dimanch 22 septanm 2024 pase a, nan katye popilè koridò boutèy ki chita nan zòn Sid vil Okay.
Okay, lendi 23 septanm 2024
Nouvèl asasinay Emmanuel Luma aka Manno sou manman pitit li, Vania Duliepre choke sitwayen yo nan komin lan, Militan dwa moun yo epi pouse lòt sitwayen reflechi sou Kisa ki ta lakòz yon gwo zak konsa.
Daprè Jean Bénissel Bélas, krim lan sanble ak yon krim pasyonèl. Daprè premye ankèt li mennen se pa premye fwa moun yo nan dyèl pou kesyon jalouzi kote gwo batay konn pete. Men fwa sa, koze yo dejenere kote mouche a aprè l fin asasinen fanm lan ak plizyè bal, mete fen nan lavi l.
« Se pa premye krim pou jalouzi ki fèt nan komin lan. Lè se pa fanm sou mari yo se mari yo ki asasinen madanm yo. Men sa se yon gwo, gwo krim ». Responsab òganizasyon Union des Formateurs_Animateurs du Sud en Éducation Civique et le Respect des Droits Humains (UFADESH), kontinye pou l di jalouzi ap fè ravaj kay moun yo epi pa gen twòp prevansyon pou sansibilize moun yo. Pou pwoblèm, ka toujou gen pwoblèm men afè pou yo rive nan pwen sa se regretab.
Bò kote pa Marie Flaure François k ap dirije Collectif Femmes Sud pour le Développement Durable (COFSUDD), sa se twòp atò!
Moleste, inyore, bat, touye… medam yo pa sispann viktim egzaksyon mesye yo toupatou nan peyi a.
Pou kòdonatèz COFSUDD la, chak antite nan sosyete a gen patisyon pa yo pou yo jwe nan kaba zak vyolans yo ki dwe pase pa edikasyon. Kesyon respè, diyite, lavi moun, lanmou … dwe koumanse anseye tou piti kay timoun yo san eksklizyon pou aprann yo renmen epi respekte tèt yo, respekte lavi. Gen yon seri modèl mizik menm radyo yo ak televizyon ap woule k ap banalize zak vyolans yo, denigre kòm fanm, ministè Lakilti ak Kominikasyon dwe sanksyone yo.
Pi lwen, li di fenomèm kase fèy kouvri sa a, pwoteje bouwo yo, ankouraje zak vyolans yo kontinye fèt ak enpinite a. Se pou otè zak sa yo pini selon sa lalwa prevwa pou sa.
Daprè enfòmasyon yo, Vania, 37 lane, komèsan, asasinen kite 2 pitit, youn ladan yo se pou Manno, 41 lane, te konn fè tèt li pase pou polisye men anreyalite se yon anplwaye sivil nan sèvis Sid Direksyon Polis Jidisyè (SDPJ). Li te konn wonfle jenn fanm nan depi li ta ap pale ak yon lòt gason. Yon aksyon viktim lan pa t janm denonse nan pote plent pou bouwo a.
Apre konsta legal jijdepè sipleyan komin Okay la, Dupuy Dejardins, akonpaye ak grefye l Smay Journal, anprezans polisye SDPJ yo te otorize papa premye pitit fi a leve kadav yo al mete nan mòg Sakrekè.
Nan dènye mwa sa yo, nouvèl maspinay, asasinay sou medam yo flanbe rezo sosyal yo. Lè se pa polisye, se avoka, komisè Gouvèvman oubyen lòt diyitè ki ta dwe yon egzanp nan sosyete a ki enplike nan zak malonèt sa yo.
Maks – Enmbèr Marslen
RTM
