Tout Kote l Pase l Echwe, Nasyonzini Pap Ka Fè Mirak La!

Fòs Nasyonzini yo toutouni tout kote yo pase. Menmjan an Ayiti yo te jwenn lòd pou distribye zam nan katye popilè nan Pòtoprens, yo mennen yon politik bwakwaze an Afrik pou fasilite teworis vale teren, lè eta mafya yo pa ba yo lòd atake popilasyon yo dirèkteman. Konsa, ansanm pèp afriken yo leve kanpe kont tout misyon payas Nasyonzini yo sou kontinan an. Yo chase yo O Wannda, Nan Sant Afrik, Mali, Nan Boukinafaso elatriye.

Depi apre kreyasyon l, Loni voye anpil Misyon lapè pou al mete kanmpo nan peyi domine kote neyokolonyalis yo ap soufle dife. Tout kote okenn rezilta pa jwenn, Misyon Nasyonzini yo toujou fini mal.  Imaj li ap degrengole, alòske Enstitisyon sa te bay anpil espwa lè l te fenk kreye apre 2èm gè mondyal la. Poukisa? Paske mafya entènasyonal la itilize kòripsyon pou privatize tout ògán òganizasyon an, kote Ajan l yo resevwa gwo mago pou tout desizyon k ap rann, tounen nan avantaj peyi mafya yo. Sa vledi aksyon k ap poze sou teren an, desizyon k ap soti nan ògán ki ta swadizan endepandan yo, koube yo anba lòd dirijan politik mafya entènasyonal la, ki gen abitid grese pat anplwaye Loni yo. Se pou tèt sa, nouvo fòs okipasyon k ap antre nan peyi a p ap diferan, paske se ameriken ki chwazi moun ki pou konpoze l, se li k bay lajan, se li k ap koumande l anreyalite pou l vin defann enterè ameriken sou teren an. Oksidan global la sou yon liy fachis, fòs okipasyon an p ap gen pou vin konbat Gang nan peyi dAyiti. Babekyou deja repete pawòl la; fòs yo ap vini pou kolabore ak Gang yo menmsi Ameriken ap byeze koze a lè l di Babèkyou pa t dwe lage l konsa. Donk kòm “Prezidan Traore ( Boukinafaso) di ke Oksidan enpoze nou yon gè amò ke pèp viktim yo dwe mennen” , ayisyen konsekan dwe kontinye òganize yo pou yo batay kont Gang yo ki anba kontwòl Core-Gwoup la nan peyi a.

Fòs Nasyonzini yo toutouni tout kote yo pase. Menmjan an Ayiti yo te jwenn lòd pou distribye zam nan katye popilè nan Pòtoprens, yo mennen yon politik bwakwaze an Afrik pou fasilite teworis vale teren, lè eta mafya yo pa ba yo lòd atake popilasyon yo dirèkteman. Konsa, ansanm pèp afriken yo leve kanpe kont tout misyon payas Nasyonzini yo sou kontinan an. Yo chase yo O Wannda, Nan Sant Afrik, Mali, Nan Boukinafaso elatriye. Pèp yo dekouvri ke tout ajan Loni yo se mèsenè k ap travay pou lajan anba lòd mafya oksidantal la. Donk, sa y ap vin regle an Ayiti? Lide chèf mafya a andegraba. Pèp ayisyen pakwè nan pawòl mansonj Etazini ankò, Ameriken ap travèse yon kriz ideyolojik grav, Espwa dominasyon yo chita sèlman sou fòs brital. Mouvman leve  kanpe nan Bwakale a simen dout nan kan mafya kote yo wè aksyon Gang yo gen limit, pèp la ka rive goumen ak Gang yo. Ositou Etazini sonje ranfòse fòs represif yo sou teren an nan deplwaye lòt sòlda etranje pou anbrigade ak izole grenn polisye pwogresis ki t ap soutni Mouvman Bwakale a. Donk okipasyon an gen misyon pou:

1. a) pwoteje Pouvwa Gang PHTK/Aryèl Anri a
2. b) pwoteje Gang yo kont menas Bwakale a k ap pran chè nan peyi a
3. c) pwoteje enterè mafya ki nan Depatmandeta Wachintonn yo annakò ak Gang yo.

Kidonk fòs entènasyonal la p ap gen misyon vin elimine Gang nan peyi a. Etazini k ap travèse yon pwoblèm moral ak yon kriz konfyans nan sosyete a, pa anmezi fè pase lòd li nan neyokoloni an. Li konstate feblès Gang yo fas ak fenomèn Bwakale pasyèl la. Pou asire kontinwite dominasyon l, li deside fè antre yon fòs dapwi ki pou ride Gang yo ak pouvwa Gang PHTK a devan menas leve kanpe jeneral mas popilè yo nan pwochen jou yo. Jodi a politik mafya a mennen Etazini, Lafrans ak Linyon Ewopeyèn nan yon enpas jennen. Pèp yo konnen ke se yo ki dwe goumen pou libète, yo deside kanpe anfas eskamotè yo, anfas sistèm mafya a, anfas asasen yo. Ayiti p ap rete dèyè, pwogresis yo dwe kontinye travay nan mitan mas popilè yo nan tout peyi a, pou byen prepare leve kanpe jeneral la pou konbat Gang, dechouke pouvwa domèstik la, pou libere peyi a anba dominasyon mafya entènasyonal la.

Viv Mobilizasyon Pèmanan Pou Pwojè Nasyonal La!

Viv Inite Popilè a!

Libète ou Lanmò !

Vwa Rezistans Popilè No9

Komite Rezistans Popilè Benwa Batravil, KRPBB 21 dawout 2023.