Odyans yo pa reprann nan Palè jistis jiridiksyon Okay la kèk jou apre Grefye yo te fin leve grèv ki te bloke tribinal yo yon pa epi denonse yon lèt Pakè voye bay Grefye anchèf Tribinal Premye Enstans lan, daprè Batonye lòd avoka Okay yo, Roosevelt Louis ki reponn kesyon radyo Montagna, maten madi 4 jen 2024 la.
Okay, madi 4 jen 2024
Akote seyans yo ki pa reprann nan Tribinal Premye Enstans Okay la gen lèt Administratè Pakè Okay a voye bay grefye anchèf la, Ernst Duverseau k ap leve plim sou do avoka yo nan Bawo Okay la.
Batonye lòd avoka yo denonse Ministè Piblik ki pa t met pye nan tribinal Premye Enstans lan tandiske Jij, Grefye ak Isye te deja la. Mèt avoka Louis pa konprann kouman pou Pakè jiridiksyon Okay gen plis pase yon 10zèn komisè epi yo youn pa prezante nan TPI a pou seyans yo ka dewoule. Yon lòt kote, Batonye a rale yon dokiman jal komisè Ronald Richemond ekri grefye anchèf TPI a nan dat 29 me 2024 pase a pou mande l pa delivre okenn sètifika negatif epi tou pwofite mande l yon ti tan soti jedi 30 pou jedi 6 jen 2024 la pou l ka voye tout dosye ki nan grèf Pakè a ba li.
Batonye a di lèt chèf Pakè a al jwenn enstans ki pi ba nan chenn jidisyè a , grefye anchèt la. Bon chwa a se te ekri Dwayen pou yon ti bout tan an, Mèt avoka Rose Marthe Louis Jeune ki kenbe pou Dwayen Jocelyn Lucien ki pa nan peyi a. Grefye a, daprè Roosevelt Louis pa lye ak Pakè a, komisè a paka ekri l. Se anba lòd Dwayen an grefye ap travay. Pou rezon sa yo, Batona a pral chita pou yo konnen Kisa yo dwe fè.
Pou yon lòt Mèt avoka militan ki reponn kesyon radyo Montagna men ki pa dakò pou non yo site di lèt la ilegal. Grefye a pa chèf Dwayen an. Nan koze administrasyon se yon amòmali.
Pou Mèt la, lè jal komisè a fè aksyon sa, li vyole dwa moun li arete mal oubyen byen yo. Se yon privilèj manman lwa peyi a, lè yon moun arete li gen yon kantite lè pou l pase anvan li wè jij natirèl li. Depi delè sa a pase konstitisyon 1987 la di defansè l ka fè yon demand « Habeas Copus » devan jij libète chak moun ki se Dwayen an pou gade si arestasyon an legal.
Soti yon tèks konsa nan pa bay sètifika negatif, yon dokiman enpòtan nan pwosedi yo, komisè anchèf la vyole dwa moun yo. Li arete yo, fèmen yo nan prizon epi pa voye dosye yo douvan kabinè enstriksyon paka ap mande Sirsi.
Pandan peryòd grèv Grefye yo se pa ni 3 ni 11 dosye ki pa soti nan Pakè al nan kabinè. Pouki dosye sa yo menm pa t ale? Lè komisè a arete si se yon deli koreksyonèl oubyen krim pa gen tande moun yo. Se prepare dosye a epi voye l nan grèf TPI a pou Dwayen an ka mete yon jij sou dosye a. Men dosye sa yo te ret konpile nan Pakè pou petèt lòt rezon.
Madi sa a selon orè nan tribinal la se dosye kriminèl ki ta dwe ap pase. Men si lendi 3 jen 2024 la Ministè Piblik pa t prezan pou tribinal la te fonksyone nan dosye sivil akòz komisè yo pa t mete pye enben y ap gade si yo p ap la maten madi 4 jen an nan dosye koreksyonèl. Paske dosye sivil ak penal yo pa gen menm chaj. Yo chak gen enterè pa yo. Anpil fwa, daprè Mèt avoka a se kote pou komisè yo vin jistifye gany li yo nan odyans.
Avoka a fini pou l di, yon lòt bò jal komisè fè soti lèt ilegal li a yon fason pou bare oubyen pran desizyon sa a pou anpeche kèk gwo kriminèl Pakè te arete jwenn libète yo ak « habeas Corpus ». San sètifa negatif la, avoka yo paka entante pwosedi sa a.
Donk, jal Komisè a antisipe nan vyole dwa moun yo. Kòm lèt la ilegal, avoka yo pral nan lese frape ak grefye a pou jwenn sètifika negatif la. Si anyen pa fèt, avoka a pral rele yon jijdepè vin fè konsta a pou li epi achemine dosye a douvan Konsèy Siperyè Pouvwa Jidisyè.
Aparèy jistis la sou branka depi lontan, mank sa yo lakòz kriminèl ak vòlkannize nan lari a epi inosan ap kwoupi nan prizon pou sa yon pa lotè.
Max Imbert Marcelin ( Maks – Enmbèr Marslen)
RTM
