Gerson Borgat se non antreprenè sa a bandı ak zam fizye nan machin l ak plizyè bal nan ri « Gossin », bò 2zè konsa, nan zòn Lwès vil la ayè mèkredi 2 avril 2025 la.
Okay, Jedi 3 avril 2025
Radyo Montagna konstate, vit devan machin « pick up » doub kabin koulè gri ak plak: AA- 43437 gen plizyè twou bal. Epi viktim lan panche sou bò dwat li sou levye a.
Daprè enfòmasyon yo, viktim lan te sot achte manje pou poul nan Edmax pwodiksyon ak distribisyon. Li monte nan machin li epi 2 nèg sou moto vin kanpe douvan machin lan epi simaye bal sou li. Kriminèl yo pa t ap bal chans paske li resevwa 5 bal: 2 nan tèt epi 3 nan nivo lestomak, daprè responsab UFADESH la ki reponn kesyon nou. Endistriyèl la mouri sou plas.
Aprè konsta legal SDPJ ak titilè jijdepè komin Okay la, Paul Tarte ak grefyè l, fanmi viktim lan te jwenn otorizasypn pou leve kò a epi remèt li bay yon mòg prive nan vil.
Soti madi premye avril la pou mèkredi 2 avril 2025 sa, deja fè 3 moun ki mouri ak bal. 2 premye yo fèt sou wout Kwa mati a kote se ta ekip komisè Gouvèman Nip la, Jean Ernest Muscadin fizye 2 prezime kriminèl.
Se chak entèval 3, 6 mwa nan 3zyèm vil peyi a zak kriminèl sa yo ap repete. Men otorite nan Lapolis Sid la kontante yo pou di zak sa yo plis sanble ak reglèmankont, apiye sou aspè kriminalite olye ensekirite . Antouka, piti piti, zak sa yo ap enkyete sitwayen yo epi lage yo nan laperèz.
Èske viktim lan te konn resevwa menas? Ki afè li t ap mennen? Ki dosye rantab li t ap jofre, ak kilès? Komisè jiridiksyon Okay la: Pierre Elioth Paul ak Jean Ernest Muscadin gen dosye nan men yo. Soti sou antreprenè/ biznisman Berlin Aléandre kite asasinen nan pwent ri « Sténio Vincent ak 3 frères Rigeaud » nan dat 31 desanm 2010 , rive sou denye zak sa a,Lapolis pako janm mete men sou kòmanditè yo alevwa pou Lajistis ta pini veritab otè zak lach sa yo.
Maks – Enmbèr Marslen
RTM
