Nan yon rezolisyon yo pran jodi dimanch 9 oktòb 2022 a, ti rès Senatè yo mande ak Premye Minis defakto Ariel Henry, pou li kanpe otomatikman ak egzekisyon rezolisyon yo te pran nan konsèy minis 7 oktòb pase a ki mande kominote entènasyonal la pou deplwaye yon fòs lame etranjè sou teritwa ayisyen an pou ede yo rezoud kriz ensekirite k ap travèse peyi a.
Okay, 9 oktòb 2022
Kèk jou apre minis Afè Etranjè peyi Dayiti , Jean Victor Généus te fin deklare sou tribin Nasyonzini gouvènman li reprezante a gen tout kontwòl sou kriz tout kalte k ap sakaje peyi a , menm gouvènman sa a pral pran yon rezolisyon nan konsèy minis nan lannwit 7 oktòb 2022 a ki jwenn siyati tout manm gouvènman an, ki mande ak kominote entènasyonal la pou vin pote èd militè ba yo pou fè fas ak ensekirite ak lòt pwoblèm peyi a ap fè fas. Yon dezisyon ki pral leve plim sou do pèp ayisyen an ki gen yon move eksperyans ak misyon sa yo ki pa janm pote anyen pozitif pou peyi a. Jounen dimanch 9 oktòb 2022 a swa 2 jou apre , demand pouvwa an plas la se tou pa ti rès senatè yo ki pran yon rezolisyon pou mande gouvènman Ariel Henry a pou kanpe sèk sou demach sa a. Daprè rezolisyon sa a, Ariel Henry kòm Premye Minis defakto, pa gen okenn lejitimite, ni kalite pou pran yon desizyon konsa. Se yon zak administratif ilegal, yon eksè pouvwa. Yo mande ak gouvènman an tou pou kanpe sou desizyon pou monte gaz la yon fason pou pèp la ka pran yon souf fas ak mizè k ap fè raj nan tout kwen peyi a.
Vandredi 8 oktòb 2022 a, ansyen Minis Afè Etranjè Brocchit Edmond, aktyèl anbasadè Ayiti nan peyi Etazini, konfime pou Ajans Frans Près (AFP), wi Ayiti mande yon « Asistans Entènasyonal » pou lite kont gang ame yo ki kreye yon gwo kriz ensekirite Lapolis Nasyonal la paka rezoud pou kont li. Yon deklarasyon ki ale nan menm sans ak yon seri diplomat tankou Luis Amalgo, Sekretè Jeneral OEA, kite deja ap fè pwomosyon pou voye yon nouvo misyon nan peyi a ki tounen yon veritab laboratwa nan resevwa misyon . Sekrete Jeneral Nasyonzini , Antonio Guterres mande jounen dimanch 9 oktòb la pou yo analize prese prese demand gouvenman ayisyen an akoz gang ki anpeche gaz la soti nan santra Vare epi maladi kolera ki tounen nan peyi a.
Sa gen plis pase yon mwa kote popilasyon an nan 4 kwen nan peyi Dayiti pran lari pou mande Leta rezoud pwoblèm ensekirite a, grangou, lavi chè, rate ak monte gaz la pou site sa yo sèlman. Malerezman pouvwa defakto Ariel la derefize tande kri popilasyon an pandan tan sa a lekòl kite dwe louvri nan premye semèn septanm te repòte pou 3 oktòb, pou jis jounen jodi a okenn timoun poko ka pran chimen lekòl.
Gracia Delva, Denis Cadeau, Paul Patrice Dumont, Jean Rigaud Belizaire, Rony Célestin, Wanique Pierre, Jean Ralph Féthière, Pierre François Sildor se gwoup senatè ki siyen rezolisyon sa a epi Joseph Lambert kòm prezidan ki fè yon total 9 senatè sou 10. Yon rès sena ki trè kritike nan mitan popilasyon an pa rapò ak enplikasyon prezime anpil nan yo nan move zafè ak akwentans yo genyen nan diferan vèsyon PHTK yo pou anpil moun ki se prensipal mèt sityasyon malouk sa a peyi a ap konfwonte depi anviwon 10 dènye lane sa yo.
Franndy Lesperance
RTM
