Pankat, bandwòl, zouti agrikòl… nan men plizyè dizèn manm òganizasyon sa yo: Konbit Aksyon Popilè Sid (KAPS), Tèt Kole Ti Peyizan Ayisyen branch Sid, Mobilizasyon Peyizan San TÈ nan Sid (MOPSATES), elatriye te plante pikèt yo douvan Pakè Okay la pou denonse enpinite, zak abitrè ak ensekirite k ap taye banda nan depatman Sid la,an patikilye nan jiridiksyon Okay .
Mèkredi 25 septanm 2024.
Jan sa te anonse, plizyè dizèn manm nan òganizasyon dwa moun, peyizan, militan nan mouvman sosyal Ayisyen an ak pankat anlè mande pou: Leta fikse pri tikè avyon Sunrise ki twò chè; revoke Delege Sid la, Ketnor Estinvil pou krim; arestasyon Jackson Dena; aba lavi ch;, aba Leta tchoul; debloke wout Sid la, arete jije Ronald Richemond… pale ak chèf Pakè jiridiksyon Okay la Mèt avoka Jean Joubert Amazan.
Patisipan yo kou òganizatè relate divès zak abitrè k ap fèt sou peyizan ak sitwayen yo. Yo denonse vòlè tè ak konplisite lajistis pou arete peyizan yo. Se ka Ezechiel, yon manm MOPSATES ki fèmen nan prizon sivil Okay.
Daprè Guy Numa, manm KAPS, di se : ”Delagasyon Sid la ki ame yon bann malandren k ap atake sivil kou Lapolis. Epi Lè Lapolis arete yo ak manda pou dividal plent ki pote kont yo se komisè nan Pakè Okay la menm ki libere yo”. Komisè Amazan ap arete peyizan, pèzib sitwayen pou libere kriminèl tankou Jackson Dena nan dat 17 septanm 2024 pase a.
« Nou deja ekri Konsèy Prezidansyèl Pwovizwa a (KPT) a pou enfòme l sou pil zak otorite nan Sid yo ap fè nan Depatman an » daprè Numa ki t ap pale nan non òganizasyon yo nan mikwo radyo Montagna.
Satisfè, òganizatè yo mande patisipan yo pou lase bòt yo epi tann modòd. Paske nan jou k ap vini yo gen lòt mouvman y ap planifye pou pouse otorite yo pran responsablite yo nan depatman Sid la.
Maks – Enmbèr Marslen
RTM
