72 èdtan apre Lapolis Nasyonal Dayiti (PNH) fin anonse yo koumanse pran kontwòl tèminal Vare a nan yon pòs li fè sou paj Facebook li, responsab Vare yo anonse jodi jedi 13 oktòb 2022 a gen yon gwoup bandi ak zam ki anvayi tèminal la e ta pote ale yon kantite gaz.
Okay, 13 oktòb 2022
Nan yon pòs ki pibliye jounen jedi 13 oktòb 2022 a sou tweeter, responsab Tèminal Vare yo denonse zak kote yon gwoup bandi ame debake nan tèminal la nan lanwit mèkredi 12 oktòb 2022 a, metrize tout sekirite kite anndan an epi pote ale yon kantite gaz san bay plis detay.
Pou anpil moun nan popilasyon an, deklarasyon sa a se yon blag pou fè moun dòmi paske pou yo te toujou gen gaz k ap soti ankachèt pou al vann nan mache nwa. Yo pa panse gen yon pwoblèm ant gang yo ak moun k ap jere gaz la nan peyi a. Yon enfòmasyon RTM pa an mezi pou verifye. Men malgre gwoup gang G9 an fanmi ak alye yo deklare se yo menm ki bloke Tèminal la depi plis pase 15 jou, responsab Vare yo pa site okenn non nan Twit (Tweet) yo fè a.
Nan yon mesaj ak tout videyo PNH la pi bliye sou paj Facebook li -sa gen 3 jou – yo te anonse gen mezi ki pran kote yo koumanse deplwaye gwo estrateji atravè plizyè inite espesyalize nan PNH la pou retire pyèj bandi yo mete ozalantou tèminal la ak pou pouse do bandi yo ki pran espas la an otaj.
Se toupatou gen gaz k ap vann nan lari a 3 mil goud pou yon galon nan kapital la, 5 mil ou 6 mil goud nan vil pwovens yo. Anpil moun nan popilasyon an ap poze kesyon pou konnen ki kote moun k ap vann gaz sa yo jwenn li ? Ki kote otorite yo jwenn gaz pou yo kouri machin sitou Premye Minis Ariel ki gen yon flòt prèske 30 machin gwo silend nan kòtèj li? Ki kote yon seri ONG jwenn gaz pou fonksyone pandan moun ap mouri nan lopital yo akòz gaz ki pa genyen? Petèt enfòmasyon sa a kapab yon lòsyè sou orijin gaz sa k ap vann nan mache akote a.
N ap raple gouvènman defakto ki gen nan tèt li Premye Minis defakto Ariel Henry, te anonse nan lannwit dimanch 12 septanm pase a gaz pral monte. Kèk jou apre, Ministè Kominikasyon soti nòt li pou fikse nouvo pri yo. Nan nòt la nou li, kòm sibvansyon an kanpe , gazolin lan ap vann 570 goud, Dyezèl la se 670 goud epi Kewozèn lan se 665 goud. https://radiotelemontagna.com/nouvo-pri-pwodui-petwolye-yo-ap-antre-an-aplikasyon-apati-apremidi-14-septanm-2022-a/Nòt la fini pou l di, pri gazolin lan toujou sibvansyone nan wotè 158 goud.
Pri sa yo vin ranplase ansyen pri gazolin nan ki te vann 250 goud, 353 goud pou Dyezèl ak 352 pou Kewozèn. Yon desizyon ki pral soulve kòlè popilasyon an kite deja nan lari a pou denonse grangou, ensekirite, lavi chè ak rate gaz la.
Foto kouvèti: Google
Franndy Lesperance
RTM
