Nan yon nòt li pibliye sou kont X (Twitter) li, prezidan Ameriken an Joe Biden, 81 lane ki nan fen manda li nan tèt peyi Etazini, anonse li retire tèt li nan kous pou Lamezon Blanch nan kad yon dezyèm manda. Se jodi dimanch 21 jiye 2024 la li fè anons lan. Yon nouvèl ki tonbe tankou yon kout loray.
Okay 21 jiyè 2024
Depi plizyè semèn anpil vwa te leve pou te mande Prezidan Biden pou kite plas li a bay yon lòt moun nan kan demokrat yo apre l te fin ranpòte primè yo epi tanmen kanpay elektoral pou eleksyon yo ki prevwa 5 novanm k ap vini la.
« Mwen kwè li nan enterè pati mwen ak pa m pou fè yon kraze kite sa pou m konsakre m inikman sou egzèsis fonksyon m antanke Prezidan jiskaske m fini manda m » li ekri nan yon nòt li pibliye sou kont X li. Nan yon dezyèm nòt li soti pandan jounen 21 jiyè a, prezidan Biden anonse li pote sipò li bay Prezidan annapre a, Kamala Harris ki se potansyèl kandida demokrat yo pou ranplase Biden.
Kapasite fizik ak mantal chèf pisans enperyalis la ta prensipal koz retrè sa a. Sa gen kèk tan plizyè gwo bwa nan kan demokrat la ki te apwouve kandidati Joe Biden te koumanse pèdi konfyans kote youn apre lòt yo t ap mande li fè yon kraze kite sa. Se Ka plizyè reprezantan chanm nan, plizyè Senatè. Gwo pèsonalite tankou George Clooney, reprezantan pati a Nancy Pelosi ak Chuck Schumer tout moun sa yo mande l fè yon kanpe.
Dènye derapaj yo se fasafas li te fè nan kad deba prezidansyèl ak kandida pati Repibliken yo, Donald Trump. Repons Prezidan an te dezòdone kontrèman ak advèsè a ki li menm te pi òganize epi kòrèk nan repons li yo. 11 jiyè pase an kad Somè Otan nan Washington Prezidan ki t ap adrese l ak Prezidan Volodoymyr Zelensky kise prezidan ikrenyen an te di prezidan Poutine. 2 édtan annapre nan kad yon konferans pou laprès andirèk li t ap pale de vis prezidan Kamala Harris li fè apèl ak Trump. Siy sa yo se dènye gout dlo ki ranvèse vaz la ki pouse l pran desizyon sa jodi dimanch 21 jiyè 2024 la.
Retrè Prezidan Biden nan 4 mwa anvan eleksyon yo kreye gwo dout pou anpil gwoup moun nan peyi a sitou imigran yo. Anpil nan yo krent pou administrasyon Trump lan pa pran desizyon ki ka derannje yo paske souvan li anonse anpil mezi sou koze imigrasyon .Dènye semèn sa yo anonse chofe anpil nan peyi Etazini sou plan politik pou konnen yon pa kiyès k ap reprezante pati demokrat yo reyèlman nan pwochen eleksyon yo mentou kiyès ki pral gen rèy peyi a pou 4 pwochen lane yo.
Sous : BFM TV
Foto Facebook
Franndy Lesperance
