Chèf Pakè jiridiksyon Okay ak Lapolis arete plizyè jenn gason pou zak louch, asosyasyon kriminèl, detansyon zam ilegal nan yon operasyon ki reyalize soti Vandredi 19 pou bout lendi 22 jiyè 2024 nan jiridiksyon Okay la.
Okay Madii 23 jiyè 2024
Atravè yon operasyon ki dire plizyè jou, Lajistis ak Lapolis mete lapat nan kòlèt 6 prezime kriminèl nan komin Kanperen. Nan komin Tòbèk menm, Lapolis ak Lajistis arete yon jenn gason, 34 lane, Renold Josil, ak yon zam kreyòl.
Si nou kwè komisè James Jean Louis ki t ap pale nan mikwo laprès, « prezime kriminèl sa yo te ame ak revlòvè , manchèt. Yo te arete 5 sou 2 moto epi lòt la se lakay li nou te al arete l ». Chèf pousuit la di y ap chache yon Kasek, Emmanuel Duval ki te ede youn ladan yo, aprè l te sove nan men lapolis, retire menòt ki te nan ponyèt li.
San Komisè Jean Louis pa t bay plis enfòmasyon sou idantite prezime kriminèl yo, te pwofite voye yon mesaj bay tout moun ki gen move lentansyon pou vin tabli zak ensekirite nan jiridiksyon li a.
Pakè Okay tande, lendi 22 jiyè 2024 la, Grefye Tribinal Tòbèk la, Jean Hemso Adelson ki akize nan atak fizik sou yon sekirite ak yon jijdepè nan Tribinal Depè Okay la, jedi 18 jiyè 2024 pase a.
Nan menm jounen lendi sa a ki fè 22 jou depi kèk endividi mal entansyone te pase chenn, kadnase baryè prensipal Pakè Okay la, Lapolis arete epi transfere douvan Pakè, fonde pouvwa Kerly St Martin aka Keke de Nazareth, patizan zele jal komisè Ronald Richemond pou patisipasyon l ak lòt akolit li yo nan zak sa ki te anpeche Administratè a antre nan biwo li. Zak sa te fèt lanmwit dimanch 30 jen pou louvri lendi premye jiyè 2024 pase a. 2 prevni sa yo, aprè Komisè anchèf la fin tande yo, pral pase premye nwit yo nan prizon sivil Okay la paske dosye yo transfere nan kabinè enstriksyon.
Yon lòt kote, aprè Pè Yves Edmond, vwa yo pa sispann leve pou denonse Pakè Okay k ap dòmi sou tantativ sasinay Jackson Dena fè sou Percy Pierre Assade epi tou pwofite denonse mantı san parèy bouwo Dena fè sou Kamarad yo Guy Numa lè l akize l li fè pati gwoup eskadwon lanmò Vitelhomme. Yo mete lavi Kamarad la ak lavi fanmi l sou kont atache/delenkan sa a k ap paweze ant komin Pòsali ak Sen Jan nan Sid.
Nou ap raple, nan dat dimanch 7 jiyè 2024 pase a, endividi sa a, Jackson Déna pa t ezite rale zam li, pwente l sou Percy Assade epi kase tèt jenn gason an ki t ap patisipe nan aktivite manje lamveritab Konbit Devolpman Preskil Posali t ap reyalize nan lakou Lekòl Kafou Jout la. Nan dat 18 jiyè li ta deklare li resevwa bal epi lonje dwèt sou Pè Edmond, Numa ak Assade ki ta dèyè zak sa a.
Plizyè kote nan depatman Sid la gen fwaye eskadwon lanmò k ap atake sitwayen, maspimen yo, dechèpiyè yo, sasinen yo. Kite prezime kriminèl yo ap vòlkannize se posiblite pou san kontinye koule nan kominote yo.
Max – Imbert Marcelin ( Maks – Enmbèr Marslen)
RTM
