Jan anpil moun t ap jofre l nan Depatman Nòdès peyi a, komin Wanament anpatikilye kou rès peyi a anjeneral, chèf pousuit Fòlibète a simaye lèt envitasyon kou manda voye bay plizyè moun pou prezime enplikasyon yo nan kraze pòtay fwontyè Dajabon ak Wanament lan epi jete l nan rivyè Masak la daprè enfòmasyon yo.
Okay 22 desanm 2023. Komisè gouvènman Fòlibète a, Av. Eno Zephyrin ki reponn kesyon radyo Tele Montagna di li pa voye lèt envitasyon bay yon sèl sitwayen nan kominote a. Komisè Gouvènman an, ekri se pou bezwen pakè a li te site yo. 2 pou mèkredi 20 desanm pase a ak 2 pou jedi 21 desanm 2023 a plis manda arestasyon li yo.
Mèt Zephirin di pou mèdredi a li te resevwa youn epi lòt la Estimé Saint – Juste te voye yon rekèt pou eksplike li pa nan peyi a. Men enfòmasyon yo fè kwè depi kèk tan se nan vil Montekristi nan Repiblik Dominiken prezime brizè pòtay la ap viv ak fanmi li.
Pou 2 lòt ki te dwe tande jedi 21 desanm 2023 a pa t posib akòz yon move tan nan rejyon Nò peyi a. Tanka manda arestasyon yo, lapolis pa ko mete men nan kòlèt trèt yo.
Nou ap raple, plizyè jou aprè yon gwoup nèg ame te fin kraze kadna baryè fontyè a jou ki te 20 novanm 2023 pase a, menm gwoup la daprè yon sous nou fè konfyans vin ak yon kamyon anba je ajan PolisFront yo, ajan dwàn, rache baryè a epi lage l nan rivyè a. Yon zak ki te pa t pran tan pou sitwayen yo denonse l toupatou nan peyi a kou aletranje epi sitou mande pou lajistis arete lotè yo epi pini yo.
Pou zak sa a, wo eta majò nan tèt PNH la, lendi 18 desanm 2023 pase a, transfere ansyen responsab « PoliFront » lan Komisè Saurel Alexis epi se Komisè Divisyon Leonard Anténor ki ranplase l. Klamè piblik akize ansyen responsab la ki te gen bon relasyon zanmitay ak pisan antrepenè Estimé Saint- Juste ki gen non l site nan zak Kriminèl ki defonse baryè a.
Se pa premye fwa non ansyen Delege zèfèyis PHTK Estime Saint – Juste ap site nan zak louch. Lè non l pa site nan atak vyolan sou pèyizan yo nan koloni agrikòl Prevwayans lan, fè dappiyanp sou tè yo, blese ak bal chofè machin, se nan eskonbrit kraze byen Leta non l site, elatriye.
Daprè anpil moun nan Wanament, bouwo sa entouchab. Yo swete se pa tolalito k ap fèt nan dosye Kriminèl sa a ansanm ak avoka li a Mèt Evens Fils ki ta menm mande Komisè gouvènman an retire manda arestasyon ki te mete dèyè kliyan li a.
Anpil moun espere se pa Kase fèy kouvri sa epi anvlope veritab Kriminèl yo nan dra enpinite a k ap regle la. Akote moun sa yo, gen responsab dwàn lan ki ta dwe reponn kesyon lajistis pou di kisa l te fè l aprè zak Kriminèl sa a.
Kraze baryè a se yon zak imilyan. Se yon trayizon. Komisè Gouvènman an di lajistis ap chache tout moun ki enplike ladan l. Nan jou k ap vin la yo, l ap gen pou l transmèt dosye a nan kabinè enstriksyon ki pou ale pi lwen nan trake yo epi pini yo.
Si lajistis pa fè sa l dwe fè se lougal lajistis bay pou lòt gwoup moun vin kontinye detwi byen Leta, atake tout moun ki kont pou fontyè a pa louvri kenpòt jan epi pase peyi a anba pye jan otorite nan Dominikani swete fè li a.
Se pil aksyon san pinisyon sa yo ki lakòz eskadwon lanmò mòd leta sa a opilan nan peyi a. Tank jistis rann se peyi a k ap leve.
Max – Imbert Marcelin (Maks – Enmbèr Marslen)
RTM
