24 èdtan aprè nèg ame nan back up Delegasyon Sid la te fin bimen epi arete avoka militan Linscold Charles sou tèren mache jedi a, plizyè avoka kou responsab dwa moun te mase jounen jedi 21 septanm 2023 a devan pakè ak komisarya Okay la pou egzije liberasyon Mèt la , dapre konsta radyo Tele Montagna.
Vandredi 22 septanm 2023.
Daprè enfòmasyon yo, Mèt Charles te al fè yon apantaj ak eritye Antoine Simon yo, mèkredi 20 septanm 2023 a, lè plizyè nèg ame ki nan back up Delege depatmantal defakto a, Ketnor Estinvil, debake pou te kanpe operasyon an. Kòm mesye yo te ame ak gwo zam fann fwa, mèt Charles malgre ame, te pete kouri pou te eseye chape pou l. Men san rezilta. Bal pete, dezame l, ajan sekirite sa yo te arete l epi kondui l nan komisarya Okay la .
Mèt la pase kèk èdtan nan gadavi anvan jal Komisè Richemond te voye yon lòd depo ak akizasyon zam ilegal ak tantativ asasinay.
Pou kèk avoka ki reponn kesyon RTM, arestasyon an ilegal. Kouman yon ajan sekirite fè oze l nan lari a ap fè patwouy jiskaske pou yo al arete yon avoka k ap asiste yon apantay? Se yon bann nég ame ak pil zam ilegal san prezans Delege a ki arete l. Ki dwa yo genyen? Kilès yo ye?Si zam Mèt la ta ilegal, yo menm tou ilegal.
Chèf pousuit la, daprè yo, pa menm tande konfrè avoka a ni tann rapò lapolis ki pa t sou lye a, voye mèt la nan prizon. Pou rezon sa yo, yo debou pou denonse zak sa a paske chemen bouton se chemen maleng.
Komisè a ak Delege a ap jwe yon move jwèt nan eseye fè woule machin represyon yo a pou sèten lòt. Yo dakò konfrè yo a pa t dwe prezan nan espas la .Pou yo se yon kesyon politik k ap regle ak responsab pati Lavalas la nan komin lan. Yo kontinye pou di se pa rapò ak angajman Mèt la nan emisyon sosyal ak politik li ap anime « Bwa Kayiman » sou radyo Accaau ki lakòz pèsekisyon sa a. Yo krent pou lavi l. Paske tout moun k ap denonse egzaksyon jal Komisè a, se prizon oubyen lanmò.
Pa gen lontan sibtiti Komisè gouvènman Okay la, Watson Azor te pote plent pou atak vèbal li te viktim anba bouch chèf pakè Okay la.
Si sosyete a pa Kale je li yo, denonse zak otoritè sa yo talè sitwayen yo p ap ka pale nan kominote a ap pil gwoup ame sa yo:
Max – Imbert Marcelin ( Maks – Enmbèr Marslen)
RTM
