Yon delegasyon PAPDA vizite plizyè òganizasyon k ap milite nan sektè elvaj, plantè diri, anviwonnman, ekoloji nan Depatman Sid peyi a soti madi 5 septanm pou bout vandredi 8 septanm 2023 a.
Okay, Samdi 9 septanm 2023
Vizit sa a fèt nan lide pou rankontre ak divès òganizasyon konsekan tankou Konbit Ekolojis Sid (KES) ak Mobilizasyon Peyizan San Tè (MOPSATE) epi sitou rankontre ak patenè li, Tèt Kole Ti Peyizan Ayisyen nan Depatman Sid ak Nip k ap milite nan koze Anviwonnman, Ekoloji, elvaj ak agrikilti.
Nan divès rankont ak òganizasyon yo, reprezantan PAPDA yo montre yo apresye nivo angajman òganizasyon sa yo men swete yo ranfòse pi plis pou rive monte yon veritab mouvman popilè nan Gransid peyi a.
Laviwonndede sa yo se lokazyon anplis pou enstitisyon an te vizite kèk aktivite nan kesyon Ekonomi Sosyal Solidè ki chita nan kominote yo.
Kèk benefisyè aktivite tèt bèt tankou kabrit, mouton epi diferan kalite semans ki reponn kesyon radyo Montagna nan komin Kavayon, Chantal ak Okay di gen yon lane depi yo gen bèt yo. Pou yo se yon gwo avantaj yo jwenn lè PAPDA ansanm ak òganizasyon Tèt Kole Ti Peyizan Ayisyen ba yo tèt bèt la.
Yo kontinye pou di yo p ap pote neglijans ak bèt la yon fason pou l ka pwogrese epi pou yo pran rasin ak ti bèt la, paske se yon kanè. Men anplis se Kenbe l paske yo gen pou bay lòt moun tibèt pa yo nan pwogram lan lè yo rive fè pitit.
Daprè sekretè Federasyon Sid TK a, Jean Hérode Clermont, aktivite a te demare nan mwa janvye 2022 pase a. Federasyon Sid la te resevwa 103 tèt mouton ak kabrit, semans diri varyete M8, ak pwodui marechè yo. Aktivite a ap dewoule nan 5 koumin Depatman Sid la. Benefisyè yo se manm TK yo dabò anvan lòt moun nan komin sa yo jwenn pa yo selon lide « pas solidè a » ki makònen lide sosyal si gen pou youn dwe gen pou lòt.
Sekretè TK Sid la ajoute pou l di lajounen jodi li pase nan wotè 183 bèt. Si maladi pa t touye kèk chif la t ap pi wo.
Daprè enfòmasyon yo se aprè matonton tranblemantè 14 out 2021 ki te frape Depatman Grandans, Sid ak Nip PAPDA te vini ak aktivite pwosesis relevman an nan 3 faz: apui sikososyal, fòmasyon ak akonpayman epi Ekonomi sosyal solidè.
Enstitisyon an kwè nivo Konsyans ak Solidarite se modèl sa a ki pou chita andedan òganizasyon yo. Paske si gen pou youn ap genyen pou lòt. E menm pratik sa ap kondui yo sou plan politik , sosyal ak yon lòt mòd leta. Pou rèv sa a wè jou se òganize pou sitwayen yo òganize yo nan mete kanpe yon veritab mouvman sosyal popilè djanm.
Max – Imbert Marcelin / Maks – Enmbèr Marslen
RTM
