Provèb la di: ” Evite kite kadav pou w al kriye nan pye sèkèy”. Pèp nan Taba ki pa nan voye wòch kache men, t al kouche devan anbasad chèf Core Gwoup la, anbasad mèt neyokoloni an ki gen zòrèy ak adrès tout chèf Gang nan peyi a. Mesyedam Gang Milis yo ki te anba pay depi leve kanpe tèt ansanm Polis/Popilasyon ki koumanse fen avril 2023 a, gen misyon remonte teren an depi pasaj anvwaye spesyal ameriken ki te vin rankontre Gang kidnapè teworis nan Site Solèy, nan Bèlè, Matisan, Fontamara ak Laplenn, pou ankouraje bann ame yo fè tèt ansanm pou evite fenomèn Bwakale a depatcha tout bandi nan peyi a. Konsa, kòm Etazini ap benyen nan savann nan san kache lonbrit, pèp nan Taba krache verite a nan figi yo paske tout moun wè anba ameriken nan zak yo komèt sou teren an:
- a) Pèp la wè anba yo, lè Etazini te pran anbago kont Ayiti pou anpeche Lapolis jwenn zam pou konbat Gang alòske blokaj la pa aplike kont Gang yo k ap resevwa zam alepouvini;
- b) Pèp la wè anba yo, lè Etazini ap depòte ansyen militè bandi ameriken pou vin antrene ak ranfòse Gang Milis yo sou teren an;
- c) Mask la tonbe nan vizaj yo, lè Komisyon Ankèt Dwamoun Nasyonzini te di se ameriken ki voye zam ak bal pou Gang yo opere nan peyi a;
- d) E pèp la konprann ameriken yo aklè, lè anvwaye spesyal Etazini sot antre san pwoblèm nan fyèf tout chèf Gang, pou montre yo nesesite fè lapè antre yo pou jwenn posiblite reziste kont Mouvman Bwakale a. Donk Gang yo pote sou do yo mak fabrik mèt yo ki se Etazini.
Jodi a san fè gwo literati sou sa k ap pase nan kriz global la, Etazini ak lòt Mafya ki nan Core-Gwoup yo nan yon move kalfou. Sou plan politik, yo pèdi batay lide a pifò kote sou latè; Sou plan ekonomik ak finansye, tout pèp sou latè konnen yo se koken. Ositou kòm lògèy p ap kite yo fè konpwomi, yo kondane pou yo toujou itilize vyolans pou fè volonte yo pase. Devan anbasad Taba a, pèp la te sèlman al fè ameriken konnen ke l konprann jwèt Gang lan, mafya Depatmandeta te deja pase lòd pou domèstik ki sou teren an voye Lapolis ki prepare sèlman pou bwè san pèp la, pou krabinen moun ki t ap chape tèt yo anba bal Gang katèl mafya a. Jodi a tout Gang ki te anmòd pòz, jwenn modòd reprann sèvis nan katye stratejik Pòtoprens pou fòse pèp la rete nan silans li. Yo gen lòd pou kraponnen popilasyon an, pou Etazini rive enstale yon lòt ekip trafikan nan pouvwa a atravè menm eleksyon bouyivide yo. Sepandan chak jou ki pase, ameriken ak Core-Gwoup la ap gen plis difikilte paske pwogresis ak mas popilè yo ap ranmase èksperyans pliske y ap aprann goumen sou teren batay la ki mangonmen nan Mobilizasyon an.
Kidonk kriz peyi a ap anvlimen chak jou piplis paske kan mafya ap kontinye tronpe tèt li, lè l panse ke krim ekonomik ak masak y ap komèt nan peyi a, pral fòse mas yo rantre nan trou. Repons pèp nan Taba a pa inosan, lè yo te deside al kouche devan anbasad ameriken an pou pwoteste kont krim Gang yo. Tout sosyete a dekouvri men Core-Gwoup ak ameriken yo dèyè tout move kou nan peyi a. Anpil kote nan mond lan, nan Ameriklatin, an Afrik kòm nan mwayen-oryan pèp yo ap depatcha pèlen vòl ak kòripsyon ki kache nan do Demokrasi pèpè a. Fanm ak gason vanyan ayisyen yo p ap kanpe gade sèlman. Plan neyoliberal la ki gen nan vant li sèlman kriz, mansonj, masisi ak madivinèz, ap toujou kreye kondisyon pou vyolans anba lòd ameriken yo blayi sou peyi a. Moman rive pou patriyòt ayisyen yo kontinye akonpaye mas popilè yo tout bon vre nan batay pou derasinen sistèm mafya oligachi lokal ak entènasyonal la tabli sou pèp ayisyen an.
Viv Mobilizasyon Pèmanan Pou Pwojè Nasyonal La!
Viv Inite Nan Kan Popilè a!
Libète ou Lanmò.
Komite Rezistans Popilè Benwa Batravil, KRPBB, 31 jiyè 2023.
Vwa Rezistans Popilè No 88
