Opinyon-Vwa Rezistans Popilè (No25):Poukisa Mèt Neyokoloni An Kite Gang-Milisyen Yo Monte Volim Vyolans Lan Otè Sa?
Nan politik yon kout dlocho, yon kout dlofwèt enperyalis ameriken sou teren politik la, Etazini pèdi chèlbè l, li pagen kredi moral ak ase konfyans, pou pwopoze solisyon nan kriz malkadi li enstale nan neyokoloni an. Li toutouni nan je tout moun, ak patisipasyon l nan krim ekonomik, finansye ak politik peyi a ap viktim depi dikdantan, se pou sa nan operasyon ki te kadnase peyi a 6, 7 jiyè 2018 la, pèp la te di yo klèman, se tout sistèm feyodal ak neyokolonyal la l ap chavire. Eleman nouvo sa ki te parèt nan revandikasyon mas popilè yo, te anonse pwofondè ak difikilte batay la paske pèp la te kite kesyon fòm pou antre nan nati ak kalite pouvwa ak eleksyon nan peyi a. Kabwèt machann eleksyon yo kole, pwopagann ak fo pwomès yo pa mache, administrasyon ameriken an te deside voye zam ak mèsenè pou antrene Gang, ame yo e deplwaye yo nan tout peyi a. Depi lò, Gangstè ap kidnape, vyole ak touye anpil moun pou terorize mas popilè yo. Sepandan, malgre laperèz yo rive enstale nan peyi a, krim ak asasina Gang-Milisyen yo pa pèmèt ameriken yo pran kontwòl total sitiyasyon politik la. Yo pwolonje pansyon Yonyon lakay yo, kòm rekonpans pou pete yon swadizan lagè ant 400 mawozo ak chen mechan pou koupe lwès la ak pati Nò, menmjan Gang-Milisyen yo fè sa pou yo nan Sid peyi a. Toufwa, sa p ap dire pilontan pase dife pay mayi, paske se lanp kolonyalis ameriken yo ki tenyen nan peyi a, pèp la p ap kite pou Gang.
Depi 1915, kan ameriken yo te debake, sosyete a te kase an 2; klas dominan yo t ap aplodi, pandan mas popilè yo, patikilyèman nan peyizànri a, t al chache repons lan nan djòl fizi yo. Toutfwa, sovajri ak britalite okipan yo, te pouse ameriken yo itilize avyon ak lòt zam sofistike pou fè yon jenosid sou popilasyon ki t ap viv alakanpay, espesyalman nan gran Nò peyi dAyiti. Plizyè milye moun te peri anba bonb e nan kan konsantrasyon Chabè Nòdès, avan okipan ameriken yo te deside depòte peyizan padizèn ak santèn milye nan chan kann Sendomeng ak peyi Kiba, alòske yo te kouvri bon tè nou yo ak pit e plant pou fè kawotchou. Tan ale, tan vini, mas popilè ayisyen yo p ap ka dijere sovaj ameriken yo ki toujou envante fòm vòl, mepri ak imilyasyon pou reprime pèp ayisyen an atravè tout listwa peyi dAyiti. Yo vòlè rezèv lò ak tout lajan peyi a nan Bank Santral Pòtoprens an 1914, yo di se ayisyen ki bay Sida pou elimine endistri touris peyi a, yo vòlè 17 milya dola, lajan rekonstriksyon peyi a apre tranbleman tè 12 janvye 2010 la, dwèt yo te fon nan piyaj lajan Petro Karibe a, yo enstale Gang pou kidnape ak touye moun nan peyi a e yo te itilize cheval pou pilonnen refijye ayisyen yo nan vil Tekzas Ozetazini pandan yo louvri 2 bwa yo pou akeyi refijye afgan ak Ikrèn kote milisyen Leta Islamik, Alkayida ak Neyonazi ap dekapite e boule moun tou vivan. Pou rasis ameriken yo, Ayiti se yon peyi ki dwe disparèt.
Yo mete Gang Milisyen yo pou dezòganize sosyete a, fòse pèp la kouri kite peyi a pou fasilite “Core-Gwoup ” pran kontwòl total teren politik la nan moman eleksyon yo. Paralèlman, ONG ak ajan enperyalis yo sou teren an ap kontinye repete nan radyo ak televizyon yon ansanm fo pwopagann pou fè viktim yo pase pou bouwo tankou kriminèl ameriken yo ap chache fè l toupatou nan lemond. Se pou tèt sa, ameriken yo toujou dyabolize tout patriyòt onèt, pou onore machann dwòg ak bandi. Y ap pouse pèp la nan dènye retranchman l, pou l lage tèt li nan reziyasyon e aksepte yon okipasyon dirije pa yon peyi zèlvèt tankou Dominikani anba kontwòl fachis ameriken yo. Sa vledi, p ap gen solisyon nan kriz peyi a osilontan pèp la rete anba grif rasis ameriken yo.
Oksidan anba dra Etazini, pran yon liy neyofachis pou tante kontinye domine mond lan. Liy neyofachis sa, itilize Lotan pou bonbade Yougoslavi, divize l an 6 peyi e asasine Prezidan Slobodan Milosevich, yo asasine Sadam Houssen an Irak, asasine Prezidan Kadafi an Libi, divize peyi Soudan, e nan tante divize peyi Siri ak kontwole Ikrèn, ameriken ak alye l yo plase avni limanite sou yon pant danje. Erezman, anpil pèp an Azi, Amerik kòm an Afrik chwazi reziste ak menas peyi kolonyalis fachis yo. Jodi a, pwogresis ayisyen yo dwe tabli kontak solidarite ak fòs rezistans yo atravè mond lan, pou sizoka, lòt pèp ka pote solidarite yo nan batay pèp ayisyen an kont pwisans fachis ameriken an.
Kidonk, sa fè lontan peyi oksidan yo ap itilize Gang ame ak mafya pou kontwole aktivite politik ak ekonomik lòt peyi. Yo fè koudeta anba eslogan (revolisyon koulè) nan peyi Ewòp delès yo pou kreye sèk vòlè ak mafya Oligak nan peyi sa yo. Yo òganize prentan arab an Afrik ak Azi pou rive enstale Gang ak Bandi ame atravè Alkayida, Boko Aram e Leta Islamik nan yon bann peyi nan tou 2 kontinan sa yo, pou simen vyolans anfavè peyi oksidantal yo ki vle ranmase richès peyi viktim yo. Anpil moun kouri kite peyi sa yo pou al manje mizè toupatou. Lakay an Ayiti, Core-Gwoup la mete Gang-Milisyen pou kraponnen pèp la. Sepandan, apre peyi enperyalis yo fin piye richès tout peyi domine yo atravè FMI ak Bank Mondyal nan aktivite eskrokri, pèp yo p ap dosil pou lese yo fè sa yo vle, kondisyon batay yo reyini, e pèp yo an òd konba. Se pou tèt sa, an Ayiti, solidarite ak mobilizasyon pèp la pral kontinye pliske kontradiksyon ki nan baz sosyete a, kreye kondisyon pou mas popilè yo rantre pifon nan batay la. Pwogresis yo dwe kontinye travay nan mitan mas yo pou mete plis lòd e monte volim mobilizasyon an pou chavire dominasyon rasis ameriken yo nan peyi a e chase Gang-Milisyen PHTK yo.
Viv mobilizasyon Pèmanan pèp la !
Viv Inite popilè a! Libète ou Lanmò.
Komite Rezistans Popilè Benwa Batravil, KRPBB. 09 me 2022.
