Okay-Vyolans: Ajan UDMO yo nan komin Okay malmennen yon konfrè jounalis pandan l t ap kouvri yon manifestasyon.
Samdi, 28 me 2022
Lionel Baptiste, jounalis ko prezantatè emisyon sosyal/politik “Doléances” ak “Thermomètre” sou radyo Accaau pase yon move moman anba men ajan UDMO yo vandredi 27 me 2022 a sou pon Laravin nan, pandan l t ap kouvri yon manifestasyon kote sitwayen yo t ap mande pou DDS/ TPTK, Renel Soufrant pran responsablite l pou pase men nan twonson wout kafou Boyer pou rive Tobèk ki nan yon move eta. Pil twou pasi pala ki lakòz aksidan chak jou, mete lavi ak byen sitwayen yo andanje.
Konfrè jounalis la ki pale ak radyo Télé Montagna samdi 28 me 2022 a, eksplike li te aprann polisye yo monte gad yo bò pon Laravin lan pou anpeche manifestan yo al livre mesaj yo douvan direksyon an, li te deplase pou al wè. Kòm sitwayen yo vin bloke nan avansman yo, li deside pran moto l pou antre nan baz radyo a. Lè l vanse douvan polisye yo, gen youn ki pa deside ba l pase. Kòm li pale ak li, li idantifye l kòm jounalis men reyaksyon bouwo a se atake l, bimen l jiskaske li pèdi konesans pou l al rekonèt li sou kabann lopital Ofatma ki nan Deksya.
Li pa gen anyen ki kase nan kò li men anpil kote nan kò anfle epi l gen gwo doulè nan nivo zèpòl dwat la, kou l … Tòsyonè a te fèmen yon bonbòn gaz lakrimojèn nan men l epi l ap frape l tout kote nan kò l. Jouk nan moman nou ap pale a, li pako ka bwè kou manje akòz doulè.
Li pa rive rekonèt makawon polisye UDMO a paske twaka nan yo te ak kagoul, foula epi san okenn nimewo sou inifòm yo. Men klamè piblik lonje dwèt sou polisye “Robenson” kòm lotè zak la. Lendi 30 me 2022 k ap rive a, l ap pote plent lajistis kont twoup polisye sa a.
Yo anpil konfrè jounalis polisye moleste, bat epi blese nan komin Okay la. Dènye ka a se konfrè jounalis Vanel Soliman polisye UDMO yo te bat nan Kans ozalantou ayewopò Antwàn Simon Okay la nan manifestasyon istorik 29 mas 2022 pase a.
Yon lòt kote, jal komisè gouvènman jiridiksyon Okay la, Ronald Richemond denonse menas lanmò li di yon ajan UDMO fè l. Komisè Richemond di li deja pote plent nan DCPJ pou polisye a, ekri IG/PNH la (Enspeksyon Jeneral Lapolis). Li mete lavi pa l ak rès fanmi li sou kont polisye UDMO a, Marc Arthur Charles. Li fini pou l di, li p ap kite sivil kou polisye vin Jovenel li. Yon fason pou montre kouman anpil ajan UDMO ki prezan nan Vil Okay ap aji an gwo ponyèt, pèson pa epanye anba yo.
Toutotan okenn polisye bastonè pa pini kòmsadwa pou egzaksyon yo sou sitwayen yo, toutotan yo pa sispann kache dèyè mas yo, se posiblite yo gen pou malmennen sitwayen yo nan tout enpitite.
Direksyon radyo Télé Montagna kondane zak sovaj sa a e li pote tout senpati l ak konfrè jounalis radyo Accaau a epi mande pou ka sa a pa vin gwosi lis jounalis ki viktim nan kad travay yo ki pa janm jwenn jistis.
MAks – Enmbèr Marslen
