Yon moun blese anba bal youn nan ajan kò polis minisipal twazyèm vil peyi a nan kad yon Desandelye Lameri!
Luvie Lafague se non yon Sitwayèn ki rive resevwa yon bal nan nivo kou l nan men yon ajan polis Minisipal Okay la pandan yon operasyon Lameri t ap mennen ayè madi 10 me 2022 a, nan lokalite Mèsi, blòk SOS Village.
Daprè enfòmasyon yo, ajan yo te akonpaye sèvis jeni meri a ki te al fèmen yon konstriksyon dapre yo ki ilegal nan lokalite a. Rive sou plas, viktim lan ak lòt ta sanble te nan litij ak Lameri pou te anpeche yo kanpe travay la paske yo gen pèmi pou konstriksyon an. Se nan redi kòd sa bal tire epi blese Lafague nan nivo kou l. Kèk èdtan apre viktim nan te pral kite Vil Okay pou ale pran swen ka li nesesite nan yon lopital nan Pòtoprens.
Aksyon sa te pral pouse moun nan zòn nan bloke sikilasyon an nan twonson wout sa a ak branch bwa kou dife nan kawotchou. Lajistis deja sezi kesyon an paske 3 ajan deja ap reflechi nan gadavi komisarya a ap tann swit dosye sa a. Yon lòt ajan menm gentan met rechany mawon l sou li.
kredi foto Amos Senat
Se sou majistra enterimè Conde Kò polis Minisipal la te koumanse. Lè sa yo pa t konn pote zam lagè. Men lè dènye konsèy Minisipal la ki te gen chèf wonflè Gabriel Fortuné nan tèt li, otorize yo-dèyè do lalwa- pote zam kout kou manch long oubyen mande yo vin ak pwòp zam yo pou monte kò polis milis li a anba je tout lòt otorite yo. Defèt, kò polis la ap fonksyone epi yo bò kote Lapolis nan kèk sikonstans.
kredi foto Amos Senat
Nou ap raple nan dat 6 septanm 2021 pase a, jal Komisè gouvènman Okay la, Ronald Richemond te ekri aktyèl majistra enterimè a pou l te mande l al pote nan SDPJ/Sid pil zam fann fwa ajan PMC yo gen nan men yo nan komisarya Okay la. Nan je obsèvatè yo desizyon sa a pa t janm respekte paske ajan yo te toujou nan tout operasyon ak gwo zam sa yo pandan yo pote mas nan figi yo.
Nan dènye jou sa yo, konstiksyon tout kalite ap vin jwenn sitwayen yo nan kominote yo, mete lavi yo andanje tandiske Lameri ap fè pwomosyon pou yon swadizan plan zonaj vil la ki wè jou. Kesyon k ap poze, kilè yon konstriksyon illegal , sou ki kritè yo bay pèmi konstriksyon ak kiyès ki dwe bay li ?
Max Imber Marcelin
[…] Okay Ayiti- Ensekirite 11 me 2022 […]