Nan yon nòt ki pibliye nan dat 30 oktòb 2022 a, Biwo Swivi Akò Montana denonse ogmantasyon zak ensekirite yo nan dènye jou sa yo nan peyi a, patikilyèman nan Pòtoprens. Pou manm BSA yo konsta sila se yon pyès teyat byen kalkile ki monte yon fason pou jistifye solisyon kosmetik yo vle pote pou rezoud pwoblèm peyi ap fè fas yo.
Okay, 1 novanm 2022
« BSA ap redi ankò, kriz ki gen la pa bezwen yon debakman militè etranje pou l rezoud. Solisyon an ka jwenn ak yon veritab gouvènman konsansis alatèt peyi a, bon jan sanksyon kont oligak ak politisyen k ap sipòte gang yo, netwaye PNH la pou retire tout polisye ki afilye ak gang ame yo, mizanplas inite espesyalize nan Lapolis la pou kontwole pò ak fwontyè yo epi deplwaye bon jan estrateji ak taktik, teknoloji ak materyèl adapte pou lite kont gang ame yo. Se nan kad yon demach konsa tout sipò teknik ak solidarite kominote entènasyonal la ap byenvini », daprè sa nou li nan nòt sila a ki pote siyati plizyè manm Biwo Swivi akò sila tankou : Erntz Mathurin, Jacques Ted Saint-Dic, Ginette Cherubin.
Selon nòt la, kriz jounen jodi a se yon konplo Montana te toujou ap denonse. Se yon plan byen fabrike pou kraze tout enstitisyon anndan peyi a, eklate sosyete a epi lage l nan 2 plan men gang yo pou kreye sa peyi ap viv jounen jodi a, yon fason pou montre nenpòt solisyon san sans kapab soulaje sityasyon an men tou bay Ariel Henry larezon pou jistifye demand entèvansyon militè nan peyi a.
Pou Montana se nan simagri sa a popilasyon an ka wè genyen gwoup politik ak moun nan sosyete sivil la ki pral chita ak Premye minis defakto a pou jwenn antant istorik. Se yon fason pou yo ranfòse demand entèvansyon militè gouvènman an.
Popilasyon an dwe rete vijilan pou denonse tout konze ki pare pou mete peyi a ajenou pi plis nan chache solisyon soupoudre ki pa gen lòt objektif mete peyi a sou titèl pou li ka kontinye anfonse pi plis nan bim lan.
Franndy Lesperance
RTM
