Kòdonatè UFADESH la di radyo Tele Montagna yo pran nòt sou nouvo demand Jij enstriktè Jean Michelet Séide nan lèt ki pote dat 20 me 2024 pase a, mande manm Konsèy Siperyè Pouvwa Jidisyè a ba l mwayen nesesè pou l ka mennen enstriksyon li yo nan yon moman ensekite a ap flanbe pası pala nan peyi a, jiridiksyon Okay la anpatikilye.
Okay, madi 27 me 2024
Reprezantan òganizasyon dwa moun lan, Jean Benissel Belas, deklare se pa premye fwa Jij Jean Michelet Séide fè demand sa yo. Si l raple l, sa fè l plis pase 3 fwa kou plis apèl ansyen Dwayen TPI Okay la, Ezekiel Vaval pa t janm sispann mande bon kondisyon travay pou Jij yo.
Militan dwa moun lan kontinye pou l di, Tribinal Premye Enstans Okay kou 2 lòt ki nan Depatman Sid la alagraba. Sa ki rann enstriksyon an pa sekrèt jan lalwa ak klewonnen li a. Pa gen materyèl pou TPI yo fonksyone. Belas pran egzanp kèk Jij ki deside ak pwòp mwayen pa yo pou yo ka fè travay yo yon fason pou yo gen kontwòl dokiman y ap mete yo.
RTM, konstate Jij la gen pwòp sistèm enèji pa l nan biwo l ki pèmèt li limen yon vantilatè ak yon enprimant ki fonksyone lè jeneratris Palè Jistis la pa anmach. Jeneratis sa a kanpe epi demare sanzatann epi se 15 mil goud ki la pou achte gaz pou yon mwa. Yon eskandal!
Onore l nan dat 5 desanm 2023 pase a pou pakou li nan sistèm jistis Ayisyen soti kòm Grefye, monte Jijdepè titilè Tribinal Okay, Jij Syèj nan TPI Aken, Okay avan l nonmen kòm Jij/ Jij entriktè nan TPI Okay la. Omaj sa a se pou te valorize l kòm Jij ki p ap fè abi , k ap trete dosye yo jan l dwe trete yo epi sitou ki p ap benyen nan koripsyon k ap kangrennen sistèm jistis la nan peyi a.
Nan pale nou ak Jij la nan kare l, lendi 26 me 2024 la, di nou, ris yo anpil. Epi lennmi yon Jij onèt pa lwen l. Nan moman kote ensekirite jeneralize a ap louvri zèl li toupatou nan peyi a, jiridiksyon Okay la pa egzan.
Poze l kesyon sou nati dosye li yo, jij la di dosye pa ret tann dosye fin trete. Se chak jou Pakè ki se pòt lajistis ap voye dosye. Li gen dosye asasinay, trafik dwòg, konfli tè, pou l site sa yo. Epi gen anpil ki date 2016, 2018 pou rive lajounen jodi. Dosye yo se plizyè dizèn.
Pa gen dosye ki pi enpòtan pase lòt daprè Jij la. Men akote dosye kagezon dwòg ki debake nan lokalite Reyen komin Tòbèk nan dat 19 oktòb 2023 pase a, dosye asasinay jounalis Garry Tess disparèt 18 oktòb 2022 epi gen ka asasinay Guy Louisaire aka Guy Depo bandı te asasine douvan pa pòt kay la nan dat 28 septanm 2023, san konte avoka k ap fè dappiyanp sou tè, elatriye. Anpil nan ankèt yo bloke akòz mwayen. .
Nan lèt la, Jij la mande yon machin blennde, 2 moto 250, yon revolvè ak yon zam manch long, mwayen gaz pou deplasman li yo endispansab pou l ka travay.
Nan dènye jou sa yo, Jij la montre bònfwa l nan fason l ap mennen kèk dosye nan jiridiksyon an. Sa gen yon mwa li soti òdonans kloti l nan dosye ki enplike jounalis Max Angello Narxisse aka Angel nan detounen kamyon machandiz ak vòl machin, voye l al jije douvan tribinal kriminèl.
Kopi lèt sa a al jwenn administratè Pakè Okay la, Ronald Richemond ak minis defakto jistis la, Mèt Emmilie Prophète, Milce.
Jij yo pası pala konn ap sibi gwo menas. Sa ki konn pouse kèk nan yo pran desizyon depòtè yo sa ki retade elan dosye yo. Pou jan peyi a anlanmbo pou anpil konsène se jistis la ki lakòz.
Max – Imbert Marcelin ( Maks – Enmbèr Marslen)
RTM
