Mobilize Sou Revandikasyon Sosyo-ekonomik Yo, Ap Debouche Sou Kesyon Politik La.
Nan moman kote lide mondyalis yo ap pèdi pye, pèp ayisyen an ta dwe pwofite pou l retire Ayiti anba bòt ameriken tankou peyi afriken yo antre nan batay pou dechouke sistèm neyokolonyalis la lakay yo. Pou sa fèt, fòs pwogresis ayisyen yo dwe:
- a) Konsantre travay la sou Revandikasyon debaz mas popilè yo tankou reklamasyon pou yo jwenn Manje, Travay, Edikasyon ak Sante
- b) Mande Souverènte total peyi a pou Ameriken sispann enstale pouvwa popetwèl nan tèt Ayiti
- c) Òganize pèp la nan tout peyi a otou Revandikasyon fondamantal yo, e fè diskisyon ak konsètasyon anndan tout kouch sosyal yo sou enpòtans Revandikasyon debaz yo
- d) Chache solidarite toupatou nan mitan pwogresis lemond antye, pou jwenn mwayen ede mas yo mennen lit la kont mafya yo
- e) Relanse Mouvman Rezistans lan nan kad leve kanpe jeneral la pou libere peyi a.
Mouvman Sosyal Panafriken an pa date ayè. Li pran nesans depi plis pase 28 lane e l te konnen bon ak move moman. Anpil militan tonbe, bastone e egzile pou koz liberasyon kontinan an. Jodi a tout pwogresis ayisyen kontan wè kouman mouvman liberasyon sa ap vanse, san tenikont grosè sakrifis ki te fèt pou yo rive la. Jenn fanm ak gason afriken yo k ap denonse pwisans eskamotè anndan vant mafya entènasyonal la, soti nan gwoup strikti òganize ki pèmèt yo konprann move mannèv mafya entènasyonal la ap manniganse sou teren politik yo. Se pou tèt sa, pwogresis ayisyen yo dwe reflechi sou gwosè travay òganizasyon ki pou fèt nan mitan mas popilè yo pou prepare pèp la nan batay manch long lan.
Nan chimen jennen, neyokolonyalis yo vin pi malen ak reyaksyon yo k ap vin pi vyolan. Ameriken entèdi pouvwa popetwèl Aryèl Anri a achte zam ni Okanada ni Ankolonbi, pou ekipe Polis Nasyonal la pou l goumen kont Gang Etazini enstale nan peyi a pandan anbasad Core-Gwoup la, ap fè presyon sou polisye patriyòt ki vle batay nan Bwakale akote pèp la pou limite dega Gang yo sou teren an. Ositou, pwisans mafya yo montre kò yo toutouni nan aktivite teworis Gang mèsenè yo nan peyi dAyiti. Konsa, zak latèrè ak entimidasyon tounen yon nouvo fòm gouvènans nan ponyèt dirijan mafya entènasyonal la. Donk pou pèp ayisyen retwouve diyite ak souverènte peyi a, li dwe mennen lit la nan yon kad òganize menmjan kamarad afriken yo ap envesti enèji yo nan mitan mas afriken yo nan batay la. Ayisyen ak afriken twouve yo nan menm bato tribilasyon an kote pwisans negriye, tankou Etazini ak Lafranse deside kondwi peyi domine yo nan yon mond neyo-esklavajis. Oksidan nan yon kriz ideyolojik, pou fòse peyi domine koube anba lòd yo, Etazini ak Linyon Ewopeyèn antre nan yon liy neyofachis pou soumèt pèp peyi depandan yo. Se nan sans sa a, batay manchèt alamen anndan Bwakale a dwe kontinye, menmsi patriyòt yo dwe chache solidarite pou jwenn mwayen pou Bwakale a vin pi òganize e pi adapte ak nouvo reyalite yo. Pèp la avèti, gè bas entansite atravè Gang yo Etazini ap mennen kont Ayiti a, p ap gen bout osi lontan patriyòt ayisyen ak mas popilè yo pa rive nan viktwa final la.
Kidonk mobilizasyon popilè a bezwen pretèks klè ki antre nan enterè moun ki nan mitan mas popilè yo anndan peyi a. Afriken yo nan lari paske y ap reklame endepandans total peyi yo, pou richès ki nan tè lakay yo devlope sosyete afriken yo. Ayisyen yo dwe mobilize otou bezwen ak pwoblèm peyi a. Pèp la dwe manje, li dwe travay, li dwe jwenn souverènte total Ayiti pou dirijan l ap mete yo respèkte revandikasyon l yo. Sa fè prè 200 lane peyi a antre anba yon dominasyon neyokolonyal. Franse ak Ameriken dechèpiye tout richès ak enèji mas popilè yo, Ayiti tonbe nan katastwòf. Pou rezoud pwoblèm yo tout mas popilè nan peyi a dwe antre nan batay la. Pou sa fèt, li enpòtan pou revandikasyon yo reflete enterè tout pèp ayisyen an.
Viv Mobilizasyon Pèmanan Pou Pwojè Nasyonal La!
Viv Inite Popilè a!
Libète ou Lanmò.
Komite Rezistans Popilè Benwa Batravil, KRPBB, 28 dawout 2023.
