Core-Gwoup ak ameriken yo enstale Gang yo nan peyi a pou yo reye an mèt san opozisyon pou fè aplike tout desizyon ki soti nan mitan mafya Dapatmandeta yo.
Chapo ba pou pèp la ki pran kouraj li ak 2 bra, pou rantre nan operasyon Bwakale spontane a pou l defann tèt li, fanmiy li ak katye l, fas ak desizyon kriminèl Ameriken e Oligachi a pran pou simen Gang toupatou pou fè kidnaping ak krim nan objektif fè Ayiti tounen yon savann dezole. Kòm KRPBB te toujou siyale l nan kapsil yo, politik afebli kapasite peyi domine yo ameriken ap aplike a, soti anndan teyori ” State Building ou Nation Building”, yon Jeneral ameriken ki rele Wisley Clark te pwopoze gouvènman Etazini nan lane 2000, pou l rive kontwole pifò peyi sou latè. Jeneral sa te di osilontan ke yon peyi vin pi fèb, l ap pi fasil pou pwisans ameriken an rive kontwole l. Se pou tèt sa Jeneral la te sigjere pou Etazini toujou mete anbago, pwovoke gè bas entansite nan peyi depandan pou bloke devlopman yo. Se nan sans sa alavans, Ameriken yo te deja mete anbago zam sou Ayiti pou l pi depandan kote malgre kolaborasyon pèp la ak fòs lòd yo pou fè faskare kont Gang kriminèl yo, tach la rete difisil paske mèt neyokoloni an bay gwo mwayen lojistik ak ekip Gang PHTK yo.
Core-Gwoup ak ameriken yo enstale Gang yo nan peyi a pou yo reye an mèt san opozisyon pou fè aplike tout desizyon ki soti nan mitan mafya Dapatmandeta yo. Sepandan menmjan nan moman mas esklav yo te manke mwayen lè yo t ap antre nan operasyon ” Koupe tèt Boule kay la ” apre Konferans 14 pou louvri 15 dawout 1791 lan pou chase kolon franse, pèp la itilize entelijans ak sa l genyen pou l antre nan Bwakale pou l rive defann lavi pitit ak fanmiy li fas ak babari ameriken e Core-Gwoup enstale nan peyi a. Toutfwa pou derasinen fenomèn Gang lan tout bon vre, Mouvman Bwakale a dwe plis òganize e disipline pou mete devan je pèp la ak polisye yo, yon objektif klè e konsète pou yo atenn atravè aktivite Bwakale a. Donk pwogresis nan peyi a dwe reflechi sou yon ansanm objektif politik ak sosyal ke pèp la dwe rapouswiv nan Mouvman Bwakale a paske pouvwa Gang lan ak ameriken k ap patwone Gang yo, pral trouble aksyon Bwakale a sou teren an.
Nan moman Ameriken yo te voye Bato gè ak Sòlda pou te vin kase Bank Santral Pòtoprens pou vòlè tout rezèv lò peyi a an 1914, anpil moun pat panse ke rèy dominasyon ameriken yo t ap koumanse nan peyi a ak kalte vye zak kanbriyolay sa. Se te mal konprann listwa Etazini ki te fonde tèt li kòm Nasyon, atravè yon Jenosid ak Piyaj yo te fè sou pèp Endyen an. Yo okipe Ayiti depi 1915 pou enstale dominasyon yo, kote yo nome moun nan tout pòs enpòtan, pou fè Bidjè, òganize ak planifye vòl ak kòripsyon nan administrasyon piblik ak lòt enstans yo pou mete peyi a ajenou. 2018 Rezistans Popilè a ki pajanm disparèt sou teren an pral relanse. Pandan tout peryòd dominasyon an, ameriken yo toujou pran prekosyon jennen aksyon mas popilè yo ak yon bann fòs represif tankou lame 1934 la, tontonmakout sou Divalye san konte ajan rèstavèk ki nan Medya ak ONG yo. Represyon enperyalis la ak oligachi a pa febli, men mas popilè yo te oblije reyaji fas ak gwo menas ki te devan yo, nan yon gwo mouvman ki pral pran fòm anti-enperyalis, anti-oligachi e anti-neyokolonyal nan figi Etazini kote foul moun t ap kriye aba enperyalis atravè tout peyi dAyiti. Se nan eta sa, mas popilè yo te dezabiye kriminèl ameriken yo ak oligachi a nan neyo-koloni an. Ositou Etazini ak Linyon Ewopeyèn deside akselere aplikasyon plan ” State Building lan” nan peyi a, lè yo itilize Core-Gwoup ak Oligachi a pou simaye Gang nan tout kwen pou simen kadav ak dezolasyon nan tout lari nan vil prensipal peyi dAyiti. Konsa Mouvman Rezistans lan, pou l reponn ak vyolans oligachi a e machann lanmò ameriken yo, fè tèt kole ak polisye patriyòt ki nan Polis Nasyonal la pou antre nan Bwakale. Sepandan, ki mizanplas ki dwe fèt pou chanje karaktè spontane Bwakale a pou l tounen yon Zouti pou pèp la nan batay Liberasyon peyi a?
Pou Bwakale a tounen yon zouti redoutab nan wout Liberasyon an, pèp la dwe transfòme l, retire l nan faz spontane a pou ba l yon karaktè striktire. Mas yo dwe fè kò ak polisye yo toupatou nan peyi a pou kontwole tout zòn, mete komite katye nan tout zòn yo kote y ap gen lyezon telefonik youn ak lòt, pou chanje enfòmasyon sou aktivite Gang yo. Polisye yo dwe ride pèp la òganize komite defans yo, disipline yo pou yo etann mouvman solidarite a nan tout peyi a. Donk, pwogresis ayisyen yo gen misyon akonpaye komite defans yo, chache fè yo konprann rezon ak objektif ameriken ak mafya entènasyonal la ap rapouswiv atravè aktivite Gang yo. Konsa, travay politik san pran souf patriyòt konsekan yo ap fè sou beton an, ka ride òganize e transfòme aktivite Bwakale a nan yon gwo Mouvman kontestasyon Bwakale k ap anmezi mete sou tab la kesyon pouvwa politik la pou Libere peyi a.
Kidonk, Mouvman Bwakale a se repons apwopriye mas pèp la ap chache pote nan sitiyasyon katastwòf mafya entènasyonal la lage sou do peyi a, kote kominote mafya ap chache destabilize sosyete a pou aplike ” Plan kriminèl State Building” nan. Se yon desizyon politik kolektif ke tout oksidan vle aplike, pou simaye kadav mezi yo kapab toupatou pou afebli peyi domine pou fasilite yo kontwole yo. An Afrik, nan Amerikdisid ak Mwayen-Oryan se pa santèn milye kadav, Gang, Djiyadis ak Teworis ap fè popilasyon yo konte nan peyi depandan yo onon yon Demokrasi ak Dwadelòm pèpè mafya pou ride oligachi oksidantal la ranmase richès. Donk, libète aksyon ak pouvwa san limit Gang yo genyen anba dra anbasad ameriken pou fè sa yo vle, pouse ekip asasen yo atake pèp ayisyen an nan dènye retranchman l paske yo gen konplisite pouvwa PHTK ak benediksyon mèt neyokoloni an. Ositou, operasyon Bwakale a se enèji rezèv pèp la ap itilize pou l defann tèt li ak fanmiy li menmjan mas esklav yo te fè l atravè operasyon ” Koupe tèt Boule kay la” an 1791-1803 pou te reponn krim kolon franse t ap fè sou esklav yo. Donk, pwogresis yo dwe travay nan mitan Bwakale a pou agrandi konsyans politik pèp la ak polisye yo sou vrè rezon ki nan baz egzistans Gang yo ak tout konsekans negatif aktivite fenomèn sa ap charye kont avni peyi a. Mafya entènasyonal la se yon machin lanmò k ap pwodwi kadav ak dezolasyon nan peyi a, vyolans spontane ki akonpaye Mouvman Bwakale a dwe transfòme nan yon vyolans popilè òganize, disipline e pèmanan pou ride pèp la trouve chimen Liberasyon peyi a.
Etap1: Òganize Katye yo ak Disipline Mouvman nan tout Peyi a
Etap2: Tabli Koneksyon ant tout Komite Defans Katye yo sou tout Tèritwa a
Etap3: Mete anplas yon Komite Nasyonal k ap gen yon Misyon Politik pi Laj
Viv Mobilizasyon Pèmanan Pou Pwojè Nasyonal La!
Viv Inite ak Disiplin Nan Mouvman Bwakale a!
Libète ou Lanmò.
Vwa Rezistans Popilè No78
Komite Rezistans Popilè Benwa Batravil, KRPBB. 22 me 2023.
