Depi enstalasyon pouvwa PHTK a, Core-Gwoup ak mèt neyokoloni an deside simaye bann ame nan peyi a pou simen latèrè nan mitan pèp la. Yo resevwa zam alepouvini k ap soti Ozetazini, pase Sendomeng pou ateri nan peyi a libèlibè, nan objektif òganize Gang Milis sou teren an pou ride ameriken kontwole kadans politik la. Anpil moun kidnape pou bay lajan yo pa posede, dòt kouri kite kay ak zòn kote yo rete anba presyon chèf bandi pou chache refij sou plas piblik, san asistans pouvwa konplis Aryèl Anri a k ap benefisye sèvis mesyedam Gang teworis yo. Chak jou ki pase, Gang ap pran jarèt gras ak sipò entènasyonal k ap ba yo apwi lojistik pou rive etann zèl yo sou lòt espas pou fè plis viktim. Pou rann yo pi fò nan travay la, Helèn Lalim ak Anbasad Ameriken te deside òganize Gang Milis yo anfederasyon pou evite divizyon nan mitan yo. Se pou tèt sa Gang yo pral pran karaktè yon strikti ame òganize, ki rive rekrite anpil jèn fanm ak gason nan katye popilè kote rapò sosyo-feyodal la majinalize anpil moun ki plonje nan grangou ak gwo mizè. Sepandan dènye evènman 23 avril pase a kote popilasyon an te leve kanpe akote yon gwoup polisye ki t ap konbat Gang, bay rezilta ki montre ke sosyete a gen mwayen poze kesyon Gang lan ak posiblite pote solisyon dirab pou pwoblèm ensekirite pwograme a. Nan sans sa a, mas popilè yo ak patriyòt nan peyi a dwe fè plis jefò nan òganize tèt yo akote polisye konsekan nan Mouvman Bwakale a, pou kòwòdone e disipline aksyon yo anndan batay la kont Gang akravate ak Gang yo rekrite pou egzekite lòd anbasad yo . Ositou, Bwakale a dwe rantre nan yon pèspektiv pou relanse Mobilizasyon popilè a pou ankadre travay polisye patriyòt yo nan yon operasyon manch long ki dwe òganize tèt li sou teren batay la. Pwogresis yo dwe konsyan, lavi polisye yo andanje menmjan ak tout moun ki nan sosyete a. Donk travay òganizasyon anndan Bwakale a pou kanalize enèji pèp la akote polisye yo ijan e nesesè, paske Gang teworis yo ak pouvwa Gang Aryèl Anri a gen misyon fè gwo masak sou popilasyon an pou jistifye yon entèvansyon dirèk ameriken yo pou vin ogmante kalvè pèp ayisyen an.
Bwakale pa yon mo nouvo. Se yon slogan Mouvman Rezistans lan te itilize nan yon moman done, nan batay mas yo ap mennen pou dechouke ekip Gang Aryèl Anri/ PHTK a. Jodi a, èkspresyon sa refè sifas pou rasanble enèji mas popilè yo ki nan nesesite fè faskare kont Gang Teworis yo. Si depi Mateli ak Jovnèl Gang yo te gen pouvwa san limit pou teworize popilasyon an, evènman 23 avril 2023 yo parèt kòm yon dènye kou ki chavire bonèt pèp la. Moun yo pran lari ak mwayen yo genyen, pou akonpaye polisye k ap konbat Gang, rantre nan yon operasyon Bwakale san pran souf pou sove lavi pitit yo, byen ak lavi fanmiy yo. Ositou pèp la ranje l dèyè do polisye patriyòt yo, pou dechouke Gang kriminèl nan Latibonit, Petyonvil, Senmak, Pòtoprens annatandan lòt kote yo antre nan batay la. Poukisa pouvwa Gang lan, ajan enperyalis yo ki sou teren politik la ak patwon Gang yo ki nan kominote entènasyonal mafya a, mande anraje kont Rezistans polisye yo ak pèp la anfas Gang yo?
Sa fè lontan mafya entènasyonal la ap fè jefò, pou Gang yo rive kontwole peyi a pou fòse pèp ayisyen soumèt li anba lòd bandi legal yo. Kòm mesyedam Gang yo anmisyon pou mèt neyokoloni an sou teren an, ajan domèstik antinasyonal yo anvi wè tout Gang Milis vale teren, fè masak pou jistifye entèvansyon brital ameriken k ap gen wòl efase totalman dwa pèp ayisyen an sou sèn politik la. Konsa Etazini ak rèstavèk yo kontrarye, paske Mouvman Rezistans Bwakale a ralanti plan kriminèl la. Nan sans sa a, pwogresis peyi a dwe akonpaye pèp la ak polisye yo nan Mouvman Bwakale a ki dwe rapouswiv jouk nan bout li. Donk patriyòt polisye ki pa nan Gang, dwe kontinye goumen men nan men ak popilasyon an, pou rive kwape Gang teworis yo, chase pouvwa Gang Aryèl Anri a pou dezabiye kriminèl ki nan mafya entènasyonal la. Se pèp la ki mèt kay li jou l deside, Gang ak Core-Gwoup p ap ka anpeche l mete lòd nan lakou a.
Kidonk leve kanpe Bwakale nan dengonn Gang depi 24 avril la, fè parèt aklè anpil bagay ki te mistè nan je anpil moun avan ratibwazay polisye ak pèp la koumanse reyalize sou Gang yo nan Kanapevè Tijo-Debisi a. Lide blòf ki te fè kwè Gang yo entouchab san volonte ameriken yo, (blòf sa) tonbe. Tout moun konstate kouman potansyèl fòs popilè a san limit. Yon tibout tan pèp la mete l akote polisye yo, Gang nan jete fizi, tonbe kouri pliske kòlè pèp la ak polisye yo te tounen dife ak tanpèt ki t ap boule e charye tout move zèb. Ositou, moman rive pou pwogresis yo akonpaye pèp la ak polisye yo, nan batay pou dechouke Gang ak ratibwaze trèt ki konpoze pouvwa Gang Aryèl Anri a. Konsa, pèp la ap demaske vizaj parenn Gang yo ki nan Core-Gwoup la paske fenomèn Gang lan se yon nouvo mòd gouvènans enperyalis yo ap aplike anpil kote nan mond lan. Donk, patriyòt yo dwe pwofite òganize Mouvman Rezistans lan anndan Bwakale a, pou kapote rejim Gang Aryèl Anri a. Toupatou pèp yo ap konteste politik kriminèl mafya entènasyonal la, kote kontestasyon yo manifeste ni sou plan ekonomik ni sou plan politik. Sa vledi, li lè li tan pou Ayiti frape pye l, pou Gang sispann kidnape, touye, vyole ak apovri (dekapitalize) pitit pèp la jan yo vle pou satisfè gou ak kapris politik ekip mafya ki nan Depatmandeta yo. Ayiti bouke, pèp la dwe al chache kouraj anndan listwa peyi a kote l te reyalize revolisyon 1791-1804 la ki te sekwe baz sistèm esklavajis e kolonyalis la nan lemond antye, pou l rive reprann Souverènte peyi dAyiti.
Viv Mobilizasyon Bwakale Pèmanan An!
Viv Inite Popilè Pou Kwape Gang Ak Pouvwa Gang Lan!
Libète ou Lanmò.
Vwa Rezistans Popilè (No76).-
Komite Rezistans Popilè Benwa Batravil, KRPBB. 7 me 2023.
