Ministè Komès ak Endistri nan peyi Dayiti anonse nan yon nòt ki pibliye ayè madi 8 novanm lan, pwodui petrolye yo pral disponib nan ponp yo sou tout teritwa nasyonal la apati samdi 12 novanm 2022 a. Ministè a anonse mèkredi 9, jedi 10 ak vandredi 11 novanm 2022 yo se 3 jou ki konsakre pou distribye gaz nan tout ponp yo. Gouvènman an ap pran tout mezi nesesè pou garanti sekirite konvwa yo pou gaz la ka rive nan ponp yo dapre nòt sila a ki pote siyati Minis Komès ak Endistri a, Ricardin Saint-Jean.
Okay, 9 novanm 2022
Gouvènman defakto Ariel Henry an, kanpe an pwennfèpa. « Timari p ap monte, Timari p ap desann », mouvo pri gaz yo ap rete la malgre gwo leve kanpe nan tout peyi a kont priz gaz la ki monte plis pase 120%. Gouvènman an anonse gaz la pral rive nan ponp yo epi se nouvo pri yo k ap aplike: 570 goud pou Gazolin, 670 goud pou Dyezèl epi 665 goud pou Kewozèn jan Premye Minis / Prezidan defakto a, Ariel Henry te di l nan lannwit dimanch 12 septanm 2022 pase a.
Desizyon sa a vin ranfòse grangou ak lavichè ki te deja ap taye banda san konte ensekirite a ki se yon gwo matonton doulè, lakòz apre dat ofisyèl louvèti lekòl « tipa tipa a » lekòl la pako ka fèt jan sa dwe fèt paske paran yo fè konnen yo p ap ka kenbe si gaz la ret wotè sa a.
Nou ap raple, nouvo pri sa yo vin double ansyen pri gaz yo ki te 250 goud pou gazolin, 353 goud pou Dyezèl ak 352 pou Kewozèn, sa ki toubouling monte tout lòt pwodui yo ki deja disèt wotè nan gagann twaka moun nan peyi a.
Nan dat 10 oktòb pase a lapolis te anonse yon operasyon pou te libere santral Vare, bandi yo kontwole. 12 oktòb 2022, responsab Wineco ki se konpayi k ap opere anndan tèminal la denonse gwoup nèg ak zam ki rantre nan espas la , metrize ajan sekirite yo epi soti ak yon kantite gaz, san bay kantite ni kouman yo rive ki te tèminal la, paske bandi yo te deja koupe wout kote pou machin pase a.
Depi koumansman semèn sa a , lapolis anonse nan kad yon gwo opresyon yo rive pouse do gwoup gang G9 ki pran pi gwo santral pou estoke gaz nan peyi a an otaj. Anpil videyo k ap sikile sou rezososyal la t ap montre kouman nouvo cha blende yo te andomaje tèlman batay la te move. Ayè madi 8 novanm nan, responsab Wineco yo anonse gen yon total 45 kamyon sitèn ki chaje nan santral Vare a ki evalye ak yon total : 303 862 galon Dyezèl ak 39 301 galon Gazolin.
Pou anpil moun se fim k ap kontinye fèt paske selon yo menm kontrebann lan gen twòp gwo enterè ladann. Gaz vin tounen youn nan pwodui ki anrichi moun ki nan Leta a ak sektè prive a pi vit nan fè mache nwa, kote yon galon gaz ap vann soti 2500 a 6000 goud.
Franndy Lesperance
RTM
