Kidonk tantativ rekiperasyon k ap fèt sou Mouvman Bwakale a, konfime nivo dezawa l kreye nan kan kolonyalis ak domèstik yo, pandan l montre nesesite pou pwogresis ayisyen yo pi byen òganize aktivite Bwakale a anndan Mouvman Rezistans lan.
Nan konfizyon ak ensekirite mafya nasyonal ak entènasyonal la lage peyi a, anpil ratdokale ap pwofite pran woulib pou regle zafè pèsonèl yo. Dènyè fwa, se te trafikan Pastè Gregori ki te depanse plizyè milyon dola nan lajan l ranmase kòm ajan enperyalis, pou l trennen fidèl abiye toudeblan nan lari Etazini, pou al pase men nan tèt Gang, karese ak priye pou Gang vin gen bon kè nan neyokoloni an. Jodi a, se Pastè Mako, yon spesyalis nan fè wanga pou fidèl jwenn viza, ki ranmase foul sèvitè an mayo blan ak jònsitwon, pou al ba Gang Bwakale ak pawòl levanjil. Ant 200 al 300 moun peri anba bal ak vyolans Gang asasen yo, pandan machann levanjil la ap kouri nan savann nan, paske ni li ni lòt domèstik ki nan pouvwa a, ap fè travay menm patwon an, ki se parenn tout Gang nan peyi a. Sa k nan tèt zagoloray yo?
Evènman nan leve kanpe 6 ak 7 jiyè 2018 yo, make yon tounan nan politik tradisyonèl la anndan peyi a. Diskou Ripti ki vize retire Ayiti anba dominasyon mafya entènasyonal la, plase politisyen domèstik ak ajan sistèm neyokolonyal la nan yon pozisyon trè frajil sou sèn politik la. Revandikasyon popilè yo, twò avanse pou kite espas pou pawòl politisyen woulemdebò. Anpil lidè fomamit ak ajan enperyalis vin pentad, yo pè foure dwèt yo nan chòdyè siwo Mobilizasyon an ki t ap bouyi san rete sou beton an. Yon vid aparan sanble kreye sou sèn politik la, pastè atoufè yo anvi rantre nan brèch la, pandan y ap kreye konfizyon pou moun pa wè men Ameriken yo nan katastwòf la. Toutfwa, Mouvman Bwakale a ki mete gwo panik nan kan mafya a, pa dlo ak mayi. Pastè Mako raketè kenbe l mal, li blese paske evènman Tijo ak Debisi yo se rezilta yon maryaj ant polisye patriyòt ak pèp la. Se pou tèt sa, pwogresis yo dwe kontinye travay nan mitan mas popilè yo, pou plase Mouvman Bwakale a nan yon kad òganize otou yon chapant striktire k ap genyen:
- a) Yon selil òganizasyon disipline k ap fè alevini ant polisye yo ak popilasyon an
- b) Yon selil k ap chache tabli solidarite nan mitan òganizasyon nasyonal ak entènasyonal pou jwenn mwayen alimante Bwakale an materyèl ak posiblite pou l vin otonòm vizavi pouvwa domèstik la ak mafyozo lokal yo
- c) Yon selil ki dwe kòwòdone preparasyon aksyon leve kanpe jeneral la nan tout peyi
Donk aktivite sispèk pastè domèstik yo antre nan liy global mafya entènasyonal la k ap itilize kriminèl tout koulè pou pyeje Mouvman Rezistans mas popilè yo.
Kidonk tantativ rekiperasyon k ap fèt sou Mouvman Bwakale a, konfime nivo dezawa l kreye nan kan kolonyalis ak domèstik yo, pandan l montre nesesite pou pwogresis ayisyen yo pi byen òganize aktivite Bwakale a anndan Mouvman Rezistans lan. Ameriken ki te mize sou Gang pou elimine mas popilè yo sou sèn politik la, rann tèt yo kont nouvo fòm Rezistans sa ka pèmèt pèp la jwenn bout Gang Milis etazinyen yo. Konsa, pou rapouswiv chimen jenosid la, ameriken jwe kat pastè epav kòwonpi yo pou denatire Mouvman Bwakale a. Sepandan foto ajan Gregori ak Mako sou mayo fidèl manipile yo, fè gwo diferans ant Bwakale orijinal la k ap fèt ak volonte mas popilè yo nan batay la, konpare ak milyon pastè zagoloray yo ap depanse pou defann koz enperyalis la. Òganize! Òganize! Òganize Bwakale a, se sèl zouti ki rete nan ponyèt pèp la, pou l goumen kont jenosid pwograme a.
Viv Mobilizasyon Pèmanan Pou Pwojè Nasyonal La!
Viv Inite Popilè Nan Mouvman Bwakale a!
Libète ou Lanmò.
Komite Rezistans Popilè Benwa Batravil, KRPBB, Vwa Rezistans Popilè No 93
4 septanm 2023.
