Wilkens Tirogène aka Pouchon se non jenn gason sa a Lapolis jouke, samdi 24 desanm pase a kòm youn nan moun ki ta asasen jounalis Gary Tesse epi al jete kadav la nan lokalite Foco yon lokalite nan seksyon kominal Okay nan dat 24 oktòb 2022 pase a.
Okay, 26 desanm 2022
2 mwa apre yo te jwenn kadav jounalis Tesse Gary ap dekonpoze nan zòn Foko yon lokalite nan Komin Okay, lapolis prezante youn nan prezime asasen l yo. Daprè youn nan avoka jounalis asasinen an, mèt avoka Maxon Esta, detan li kontan pou kout filè SDPJ a men tou li krent pou prezime Kriminèl la pa jwenn liberasyon l oubyen pa mouri, lè yo konnen youn nan moun ki gen non l site nan zak Kriminèl sa a se aktyèl Komisè jiridiksyon Okay la, mèt avoka Ronald Richemond.
Chat paka ap veye mantèg. Fanmi Tesse kou yo menm swete minis defakto jistis la, Emmelie Prophète revoke Komisè akizatè a pou li ka vin reponn kesyon lajistis . Men kite l nan tèt pakè a se posiblite pou tout prèv disparèt jan sa konn abitye fèt epi anpeche fanmi viktim lan jwenn jistis epi wè Koupab yo jije ak kondane yon fason pou okenn lòt jounalis pa pase menm jan ak Gary Tesse nan komin Okay kou rès peyi a.
Gary Tesse te nan gwo bouch louvri ak jal komisè jiridiksyon Okay la, Ronald Richemond ki te fè arete l pou yon kesyon tè ki te deja regle depi plizyè mwa. Li te kenbe l nan gadavi pakè Okay la, kote yon sibtiti trete dosye a epi libere l san lòt fòm pwosè. Aprè liberasyon l, viktim lan pa t janm manke lonje dwèt sou pil move zak chèf pakè a nan bat, touye moun, vòlè tè, vòlè pyès akonviksyon tankou revòlvè, vòlè kabrit ak enplike nan trafik dwòg, elatriye.
Nou ap raple se nan dat 18 oktòb 2022 pase a, konfrè jounalis la te kite lakay li Kavayon pou l te vin anime emisyon politik « Granlakou » ak lòt konfrè li yo. Men 6 jou aprè, swa 24 oktòb 2022, se kadav li, defigire, moun nan Foko te pral jwenn.
Maks – Enmbèr Marslen
RTM
