Nan okazyon semenn pòt louvri a soti 27 fevriye pou premye mas 2024 la Lameri Okay lanse pou pran kesyon sitwayen yo, òganizasyon popilè tankou: Tèt Kole Tipeyizan nan Sid, Mobilizasyon Peyizan San Tè nan Sid (MOPSATES) ak Konbit Ekolojis Sid (KES) pote kesyon yo pou otorite yo, jodi jedi 29 fevriye 2024, daprè konsta radyo Tele Montagna.
Jedi 29 fevriye 2024
Pou 3zyèm jounen pòt louvri pou vin poze kesyon an, militan nan òganizasyon plantè diri, òganizasyon agrikòl, anviwonnmantal ak ekolojis patisipe nan seyans kozri sa a ak 2 manm Komisyon Minisipal la : Pétuel Mentor, Claire Daphné France, responsab kominikasyon Lameri a, Vital-Herne ZÉPHY ak yon konseye te fèt nan youn nan biwo yo. Chita pale sa a te dire plis pase 50 minit.
Nan pankat yo nou te ka li: Lameri, kouman ou ap panse espas lavi nan komin lan? Lameria kouman w konte pwoteje bò lanmè komin Okay la? Lameri, kijan w ap kontwole pwodui moun ap manje ki ap rantre nan komin lan? Lameri ki pouvwa ou genyen pou fòse gwo babin respekte anviwonman komin nan? Lameri kisa w di pou ponp gazolin ak izin vetivè k ap konstwi nan zòn rezidansyèl yo? pou nou site sa yo sèlman.
Gen kèk kesyon Majistra yo te fasil pou reponn epi montre yo chaje ak volonte pou yo ta fè sa yo dwe fè nan kesyon asenisman, kolekte dechè kou pwoteje bò lanmè komin lan. Men gen lòtkesyon otorite kominal yo woule, fè kont jimnastik yo men yo pa rive konvenk militan yo nan fason Lameri a kite kenpòt patikilye ap anpwazonnen lavi nan kominote yo. Otorite yo rekonèt feblès yo epi swete pou sitwayen yo kole tèt yo pou pote plent epi ekri petisyon. Daprè yo se yon fason anplis pou yo jwenn plis fòs pou yo ka aji.
Nou ap raple, nan kesyon dosye izin vetivè ilegal kay Sanon an, sitwayen yo nan kominote sa a te fè tout sa yo te dwe fè soti nan ekri petisyon, patisipe nan divès emisyon radyo kou bay antrevi ak jounal ekri. Se dividal aksyon sa yo ki te pouse Majistra Marie Sylvie Rameau ak ministè Anviwonnman nan dat 11 jiyè 2022 ak 22 jiyè 2022 ekri pou di pwopriyetè a li pa te gen pèmi konstriksyon epi ap tann Biwo Evalyasyon Anviwonnman bay rapò l sou enpak Anvwonnman yo. Men sa fè plizyè mwa depi moun nan Sanon ap monte lesyèl ak izin vetivè a k ap ponpe lafimen nan lokalite a ki anpeche sitwayen yo rete anndan kou deyò kay yo.
Aprè seyans lan, militan yo di y ap toujou kenbe flanbo denonsyasyon an jouk yo rive retire beton sou tè ki ka bay manje yo kou bloke tout estasyon gaz pwopàn kou izin vetivè ki enplante nan espas yo pa ta dwe janm enplante.
Kòm se yon premye aktivite konsa nan komin lan, sitwayen yo pat twò pote kole. Eske se paske yo pa gen pratik la ou se paske yo pa fè otorite yo konfyans? Men se yon bon egzèsis ki ta dwe pi byen divilge pou ankouraje sitwayen yo enfòme ak patisipe nan lavi administratif kominote y ap viv la.
Max Imbert Marcelin ( Maks – Enmbèr Marslen)
RTM
