8 jou aprè endividi yo pa rive idantifye fin asasinen 2 moun sou wout ayewoga Antoine Simon Okay la, blòk Bourjolly, Lapolis ak Lajistis ki pa kase yon mo bay sitwayen yo nan jiridiksyon an pouse anpil moun ap kesyone atitid kwaze bra sa.
Okay, 29 novanm 2024
Lè yon zak pase se enstans yo ki pou devan nan asire sekirite sitwayen yo pou montre otorite yo gen kontwòl sitiyasyon an. Men nan jiridiksyon Okay la, se pito, atitid kite l mache tankou manfouben responsab yo ap bay jarèt.
Komisè Gouvènman Okay la, mèt Elioth Pierre Paul, 8 jou aprè gwo zak sasinay ki pote ale lavi demachè/lotisè tè a, Jean Michel Eliscar alias Ti makout ak zanmi l, Medgine Daniel, pa pike mo bay sitwayen yo nan jiridiksyon an. Silans simityè sa a pa kite sitwayen yo san reflechi tandiske Komisè a te dwe depi jou a montre li detèmine pou mete lamen sou lotè materyèl sasinay sa yo jouk pou li rive sou lotè ki kòmandite krim la. Men, komisè a pito chita sou blòk glas li, kite sitwayen yo ap chache konprann Kisa ki ta pouse yo sasinen moun yo nan machin yo.
Daprè yon sous nan Lapolis, aksyon sa pase bò 7tè konsa nan aswè. Viktim yo te nan yon machin koulè blanch mak « Montero » ak plak JJ 01670. Sèvis Depatman Sid Polis Jidisyè a (SDPJ) rekipere yon zam 9 mm, mak Ruger ki gen nimewo 31159411 ak yon lòt chajè. Epi SDPJ ap chache kou chen fou youn nan moun Jean Michel Eliscar ta site bay SDPJ Kòm moun ki ta tire sou yo, pa plis, pa mwens.
Sitiyasyon sa a pa bò kote lajistis ak lapolis inikman. Òganizasyon dwa moun yo nan komin lan sanble pa bay zak sa enpòtans li ta dwe genyen. Si genyen ki tande l epi ap chache plis men gen lòt ki pa menm okouran si te gen 2 moun bandı asasinen nan kominote a pa mande pou yo ta fè rapò sou doub ka sasinay la pou ta eseye analize mobil krim sa a.
Selon enfòmasyon yo, jenn fanm lan te gen 24 lane, li mouri kite yon timoun anba zaj epi Jean Michel Eliscar gen 51 lane, mouri kite 2 manman pitit . Se pa premye ka, anpil lòt viktim ap plenyen, men lajistis ap trennen kò l jouk yon lòt krim konsa repwodui ankò nan kominote a.
http://radiotelemontagna.com/atak-ame-nan-vil-okay-bilan-yon-moun-mouri-youn-blese/
Maks – Enmbèr Marslen
RTM
