Pawòl la pale, kan mafya entènasyonal la ozanj, Ameriken envante yon sekrè pou konbat ensekirite ak kidnaping an Ayiti. Ay! dèyè do se nan ginen! Solisyon an te senp nan talon tout moun, poutan ayisyen yo pat ka wè l. San sipriz nan pyès teyat la, se raketè politik ki nan Depatmandeta ki anonse nouvèl la, kote yo dekouvri briskeman ke Gang yo ka ramoli pozisyon yo nan sispann kidnape ak touye moun, si ameriken bay radyo ak televizyon an Ayiti fè piblisite kont vyolans. Ensiswatil, tout Gang pral fout bounda yo chita, kidnaping ak asasina ap fini nan peyi a. Pou sa fèt malgre tou, ameriken ap bezwen 10 lane pwopagann, pase men sou do Gang, bere ak konvenk yo nan demach la. Sepandan, Bwapiwo ak Grennpwonmennen mande Ameriken yo, poukisa Etazini te oblije kite tout moman difisil sa a pase so do pèp la, alòske li te gen zòrèy tout Gang, pou l te fè yo poze tankou ma kafe san tire yon kout fizi?
Demach ameriken yo senp. An 2001, lè yo te deside koletèt ak Linyon Ewopeyèn pou mete Ayiti nan lis peyi kote pou yo enplante Gang, yo te gen vizyon demantibile sosyete ayisyèn nan totalman. Zak yo poze depi peryòd la montre aklè ke plan kriminèl la pajanm febli lakay yo. Yo kreye Core-Gwoup an 2003, retire souverènte peyi dAyiti, fè koudeta, òganize eleksyon fomamit pou destabilize peyi a. Yo fòme Gang, ame ak federe yo pou fasilite yo rann Ayiti envivab. Ameriken mete tout aktivite nan peyi a anba kontwòl yo, pandan anyen p ap mache nan peyi dAyiti. Se yo ki fè bidjè peyi a atravè FMI ak Bank Mondyal, yo neglije tout sektè kote ki ta dwe bay peyi a yon minimòm sèvis. Fatra pilsoupil toupatou, domèstik pouvwa ki anba lòd yo, detounen lajan CFGDCT(Contribution Fonds de Gestion des Collectivités Territoriales), bidjè ki te dwe konsakre pou sèvis vwari yo pou ranmase fatra. Konsa, FMI ak Bank Mondyal plase pratikman tout lajan bidjè peyi a nan ribrik, kote pou lajan peyi a retounen nan pòch oligachi mafya a.
FMI ak gouvènman domèstik yo redwi bidjè Ministè Sante Piblik, kote yo livre sante peyi a bay ONG k ap finanse l jan yo vle, e yo mete yon ti pousantaj kòb bidjè a pou edikasyon, pou lage peyi a san lopital ni lekòl. Donk, tout enfrastrikti baz peyi a delabre. Pou asire yo ke Ayiti paka redrese, ameriken simaye Gang nan tout zòn vital peyi a. Anba benediksyon mafya entènasyonal la, Gang yo trouve gwo zam pou opere libèlibè kote yo vle nan peyi a. Yo jwenn modòd pou aji toupatou san kontrent: Yo mete katye jeneral yo nan tout zòn nan Pòtoprens ak anpil kote nan pwovens ak apwi mèt neyokoli an, ki ba yo zam, minisyon ak lojistik san limit. Sepandan, gen yon evènman majè ki pase nan mobilizasyon an e l pral jwe yon wòl fondamantal nan tout aktivite nan tan k ap vini yo, pou òganize Mouvman Rezistans popilè a; pèp la rive dekouvri volonte ak detèminasyon ameriken yo pou kreye kondisyon jenosid la, li idantifye lènmi prensipal la, li wè men asasen an. Batay la ap long, pèp la dwe konsyan desa. Se pou tèt sa, lit la ap mande anpil òganizasyon ak anpil pasyans, e mas popilè yo dwe konprann kesyon an nan sans sa a.
Kidonk, plan ameriken ki pwopoze piblisite nan radyo ak televizyon pou fè Gang sispann touye ak kidnape a, se bobin fil. Se yon strateji ekip mafya kriminèl entènasyonal la, pou kenbe pèp la nan chimen fo lespwa pou Gang yo pran plis jarèt paske mesyedam Gang yo anmisyon. Pawòl kanpay 2 grenngòch nan radyo sou koze kredi pou pouse Gang pran konsyans pou sispann kidnape ak touye moun nan, se pawòl san fondman, paske Gang yo ap toujou bezwen fè lajan. Zam mansonj ekip mafya ki nan Depatmandeta a pagen ekout nan zòrèy pèp la ankò, y ap envante charabya pou retire pwojektè kritik yo nan vizaj yo paske kabwèt ekip mafya vle kole nan labou.
Nan tan pase yo Biden te deja repete l nan Sena ameriken an. Li kwè yon jenosid sou pèp ayisyen an t ap fè l plezi. Sonje l te di: ” Ki te mele l si tout ayisyen ak Ayiti ta anglouti anba lanmè!”. Jodi a, Biden jwenn opòtinite pou l pran direksyon pwojè jenosid la nan peyi a, l ap miltipliye kontak nan kan mafya a, òganize Gang yo sou teren an pou l atenn objektif la. Se pa yon aza, lè l fè kò ak Prezidan Ekwatè a, Guillarmo Lasso, yon kòwonpi ke kou Siprèm peyi Ekwatè mande palman, pou revoke pou vòlè. Kòm ou entelijan, devine swit la.
Sepandan, mas popilè yo gen yon avantaj nan batay la, paske yo deja dekouvri men ameriken yo dèyè Gang yo, y ap gen tan pou ride pèp la sezi okazyon pou prepare defans li. Donk, malè avèti pa touye kokobe, pwogresis yo dwe kontinye òganize yo toupatou nan mitan mas pèp la ak modòd klè k ap garanti souverènte peyi a, pou mete mas yo ak popilasyon an nan pozisyon ideyal pou fè faskare kont asasen ki nan mafya entènasyonal la.
Viv Mobilizasyon Pèmanan Pou Souverènte Peyi a!
Viv Inite Nan Mouvman Rezistans Lan!
Libète ou Lanmò !
Vwa Rezistans Popilè No73
Komite Rezistans Popilè Benwa Batravil, KRPBB, 17 avril 2023.
