Kernia Civil, jenn enfimyè ki te rann dènye souf li nan lopital La Place nan vil Okay nan dat 20 me 2023 pase a akòz pèsonèl lopital la te refize ba l swen pou lajan ki pa t ase dapre moun ki te akonpaye l yo, antere madi 15 dawou 2023 a, san gran piblik la ki t ap suiv dosye a pa okouran, dapre enfòmasyon Radyo Tele Montagna jwenn bò pwòch viktim lan.
Okay, 7 septanm 2023
Jan anpil moun te deja prevwa sa a, dosye Kernia Civil la pa pran bon chimen an. Antèman an rive chante preske 3 mwa aprè nan dat madi 15 dawou 2023 a, nan lokalite Mizèn, apre petisyon frè viktim nan, Pierre Billy Lavilette te adrese ak komisè Gouvènman Okay la Ronald Richemond ak jij enstriksyon k ap entrui afè a. Sa ki ka mete fen nan pouswit fanmi lan te anklannche kont responsab Lopital La Place apati plent yo te depoze a.
Fanmi an pa t vle di RTM si se yon antant yo jwenn ak responsab sant la. Pou yo, dosye a te pran twòp tan. Sa kite lage fanmi an nan plis soufrans. Pou otopsi a, li di se yon sèl medsen lejis ki gen nan peyi a epi lòt yo nan peyi etranje, sa ki bloke posibilite pou te fè otopsi kadav la.
Konkiben Kernia a, Odney Louis, yon lòt bò denonse atitid komisè a ki te gen yon konpòtman sispèk nan dosye a. Daprè sa li di, chèf pakè a antidate dokiman sele a, paske se 15 jen li te poze sele epi li mete 1 jen. Odney di li te vin santi l ekate, li vin pa konn plis nan fen dosye a.
Dimanch 28 me 2023 a, rezososyal yo te pral leve anflame ak nouvèl lanmò Kernia Civil nan Vil Okay apre fanmi l ki te soti nan yon premye lopital ki te refere li La Place akòz ratman Oksijèn. Plizyè sekans videyo kamera siveyans te pral soti sou rezososyal yo pou montre kouman sèn lan te dewoule, sa kite choke plis moun. Sekans sa yo te pral pwouve deklarasyon pwòch viktim nan malgre responsab lopital la te soti nòt pou lage responsabililte a sou premye lopital la ki te transfere viktim nan san oksijèn.
Premye jen 2023, chèf pakè jiridiksyon Okay la, Ronald Richemond te poze sele sou lopital la epi mete entèdiksyon pou responsab La place yo . Desizyon sa a pa te pran aprè komisè a te jwenn refi bò kote responsab yo ki te refize ba li videyo kote pasyan an te rive jiskaske li trepase sou chèz la. Jal Komisè a te menm mete yon manda rale mennen vini deyè responsab yo. Men kèk jou apre tout moun pral sezi wè chèf pousuit la leve sele a epi pòt lopital la louvri ap fonksyone.
Kenia Civil mouri tou ansent dapre mennaj li Odney Louis. Li te gen gen 25 lane , li te nan katriyèm ane syans enfimyè. Yon lanmò ki revòlte anpil moun nan peyi .
Eske kounye a mèt Richemond pral rann jistis ak sosyete a lè tout moun sonje jan li te pote boure sou dosye a ? Dewoulman dosye sa a ki te touche tout kouch sosyal nan peyi a jan sa te pase a fini menmjan ak tout lòt dosye ki fè bri san rezilta. Se yon dosye ki montre yon lòt fwa lajistis nan peyi Dayiti pouri menm dekonpoze. Sa montre lavi pa gen okenn enpòtans pou otorite yo ak rès sosyete a. Malgre dosye sa a mete otorite jidisyè yo nan vil Okay toutouni, sal nouvel RTM rete ap suiv ki kote lajistis ap rive nan dosye sila menm jan ak plizyè lòt ki nan tiwa.
Franndy Lesperance
RTM
