Nan 2 mwa ankò moun k ap frekante twonson wout Laravin – Tòbèk ka jwenn yon solisyon ak eta wout la, si yo ba l mwayen daprè Direktè Sid /TPTC a, Pierre André Renel Souffrant ki reponn kesyon kèk jounalis, ayè madi 7 fevriye 2023 a nan biwo l, pami yo, jounalis Radyo Tele Montagna.
Okay, 8 fevriye 2023
Nan prezantasyon bilan yon lane depi li nan tèt Direksyon Depatmantal Sid/TPTK a, enjenyè sivil la fè eta kantite pwojè k ap reyalize nan mwens 8 komin Depatman Sid la tankou Kavayon, Tibiwon, Kòtdefè, Aken, Lèzanglè, Tòbèk kou sant vil Okay. Travay pase men sa yo ap fèt nan wout tè bati yo kou wout ki fèt an beton yo oubyen fè kanal pou dlo kouri.
Nan bilan DDS la t ap prezante a -san bay laprès yon kopi li pa di konbyen lajan aktivite yo koute -, li rale pil travay li reyalize pandan yon lane depi l nan tèt bwat la, espere lajan biwo santral pral ba direksyon an ap pèmèt li manyen lòt komin li pa site yo.
Poze l kesyon sou travay k ap fèt nan sant vil Okay la, DDS la di gen dalo, beton ki fèt nan plizyè ri nan vil la, ret kiraj yo ki pou fèt. Daprè li si travay kiraj la pa fèt, lòt aksyon y ap san valè. Li pran egzanp pwent ri Jeneral Maryon ak pwent boulva 4 Chemen an ( bò kay Mannini). Li di se jouk nan pwent anbouchi dlo Lilèt pou travay sa a al fini. Se BECOS plis k ap fè egzekisyon pwojè sa a. Fim konstriksyon an te gen 4 mwa, men twoub politik yo te bloke san li pa di kilè mèt ouvraj la ap remèt travay sa.
Pou twonson wout pon Laravin – Tòbèk, popilasyon an ap rele anmwey pou pousyè a. Direktè a di pa gen yon pwojè sou wout Tòbèk la. Li deja fè dekape l (leve asfat la) men l ap tann otorite yo ki pou ba l mwayen (anreji selon tèm teknik lan) pou l achete gaz epi pwodui materyo pou l fè sa li gen pou l fè. Li kontinye pou l di, gen yon ekip k ap vin demare ak etid topografi a nan jou k ap rive la yo.
Enjenyè Souffrant rale pwoblèm izin gravèl nan Kanperen an ki anpàn depi plis pase 2 lane ap repare lajounen jodi. Konsa li pral ka pwodui materyo tankou 31-5 pou premye kouch, sab 0-6 ak 6-10 pou l ka fè anwobè a. Depi li fin repare l se trapde, sitwayen yo ap jwenn satisfaksyon.
Kafou Demapou – sant vil Okay ak twonson wout Tòbèk pou rive Pòsali se priyorite l pou lane 2023 a. Rete pou direksyon TPTC jwenn anvlòp lajan ki pral pèmèt li reyalize yo.
Nou ap raple nan dat 27 me 2022 pase a lapolis te bloke yon manifestasyon nan pwent pon Laravin lan pou te anpeche sitwayen yo te vin depoze kaye revandikasyon yo nan biwo TPTC a.
Pou eta sant vil Okay ak katye popilè li yo : ma dlo pasi pala, anpeche sitwayen apye yo sikile, plizyè ri fann depi matonton tranblemantè 14 out 2021 pase a, pon Laravin fin deloke , ap danse. Si pa t gen gagotè nan bwat sa a imaj 3zyèm vil peyi a t ap diferan jan li twouve li lajounen jodi.
https://www.facebook.com/100001460538533/posts/5372206492837982/?d=n
Max – Imbert Marcelin ( Maks – Enmbèr Marslen)
