Bò 11zè konsa, maten mèkredi 23 oktòb 2024 la, nan yon lese frape ant yon patwouy Lapolis ak kèk nèg ame ki t ap fouye yon machin piblik nan blòk 2 Mapou lakòz plizyè moun sòti blese nan kouri kou ak bal, ladan yo yon polisye. Epi yon bandi mouri, daprè yon sous nan PNH- Sid la ki enfòme sal nouvèl Radyo Montagna.
Okay, mèkredi 23 oktòb 2024
Selon enfòmasyon yo, Patrico Lexis 27 lane, se non brakè a ki te akonpaye ak yon lòt delenkan parèy li ki t ap fouye yon machin piblik, nan zòn 2 Mapou, lè Lapolis te fè fas kare ak yo. Pou yo te chape poul yo, kriminèl yo ki te ame ak yon pistolè « Taurus, 9mm », sou moto, pa t ezite louvri kout bal sou patwouy mobil la epi tonbe rele bare vòlè pou yo te ka kite zòn lwès sant vil la.
Daprè sous la, se nan zòn Brefèt, youn ladan yo te pral touche dèyè moto a epi tonbe atè. Tanka akolit eskamòtè ki te akonpaye li a, malgre li ta touche rive kite zòn lan. Pou polisye viktim lan menm ta sanble eta sante l estab men ap pran swen ka l nesesite nan yon lopital nan vil Okay.
Kò malfra a, san konsta jijdepè, te remèt bay Lameri Okay ki pa t pran tan pou antere l nan gran simityè Okay la.
Nan dènye jou sa yo, zak brakaj yo pa manke pa repete nan vil la lajounen kou nan nwit, pouse anpil moun ap kesyone monte ensekirite a. Lapolis nan 3zyèm vil la peyi a ki la pou « Pwoteje ak Sèvi » dwe pi prezan nan komin Okay kou rès depatman Sid la pou voye yon siyal klè bay eskadwon lanmò yo.
Maks – Enmbèr Marslen
RTM
