Okay, 7 jen 2022
Plizyè santèn moun sou demand fanatik jal Komisè gouvènman Okay la ki fè Pati gwoup ki pote non “Jeunesse Engagée pour la Sécurité du Sud” (JEPSS), mache jounen madi 7 jen 2022 a, bò 10 zè konsa nan maten anba gwo eskòt Lapolis daprè konsta radyo Télé Montagna. Sipòtè yo di Komisè Ronald Richemond pa dwe revoke jan rezolisyon avoka yo nan bawo jiridiksyon Okay la te mande sa nan fen mwa me pase a.
3 bann rara, yon machin son anime manisfestan yo ki te sou pik yo. Yo te jwenn espas Boulva 4 chemen an san kontrent pou layite kò yo. Lapolis te mobilize pou te anpeche machin kou moto sikile sou li. Sa ki te lakòz kèk sitwayen te nan bouch louvri ak ajan administratif kou UDMO yo sou pon sant sante a ak k-Syèl ki se selon sa yo di ki vyole dwa yo.
Nan mayo ak kèk pankat nou te ka li: “Komisè Richemond p ap fè wonn pòt”, “Aba tout moun k ap defann bandi”, “Aba tout avoka konwonpi”, “Aba bandi ak kravat”, “Okay p ap tounen Matisan” ak anpil pawòl piman bouk òganizatè yo ak manifestan yo te lanse kont avoka yo ak kèk jounalis nan plizyè emisyon radyo nan vil la sitou emisyon “ Gran Lakou” k ap kritike ajisman Komisè a,sitou nan emisyon “Gran lakou” ak “kloch la sonen ” nan radyo Lebon FM k ap kritike ajisman komise a.
Daprè enfòmasyon yo, gwoup zanmi Komisè a (JEPSS) wè jou apre Bawo Okay la te fin soti rezolisyon ak 3 pwen li yo nan dat 29 me 2022 a pase a. Nan rezolisyon sa a, avoka yo pa rekonèt mèt Ronald Richemond kòm Komisè. Bawo a mande Ministè Lajistis revoke jal Komisè an paske non l pa sispann site nan move zak tankou : arestasyon ilegal, liberasyon pou lajan, negosye libète, arestasyon avoka, denigreman yo elatriye.
Se depi aprè debakman Komisè a ak ekip li plis Lapolis nan Ayewopò Antwàn Simon Okay nan kad manifestasyon istorik 29 mas 2022 a pase a, Ronald Richemond koumanse pèdi plim nan jiridiksyon an ajoute fo pa li te fè nan arestasyon kèk sitwayen li te di se bandi alòske li te pral lage yo sou presyon kèk sitwayen nan komin lan ki denonse zak abitrè sa yo.
Komisè a te parèt nan mach la kou DDS/ PNH- Sid la, Daniel Compère ki te antoure ak polisye te apye pandan manifestasyon an ta pral fini. Nan pale ak sipòtè li yo, Komisè Richemond kite pote sou li yon mayo blan , mande avoka yo resezi yo epi vin met tèt ansanm ak li. Li kontinye pou l di Lapolis Okay ak Pakè a ap trake tout bandi. Si yo pa vle depoze y ap repoze. Se pou bandi yo rete lwen jiridiksyon an sinon se nan simityè yo prale.
Kwape ensekirite jeneralize a se sa peyi a ap tann nan men Lapolis ak Lajistis. Touye bandi yo se pa sa lwa peyi a di. Se pito arete yo pou remonte ak tèt la, jije yo epi kondane yo.
Max- Imbert Marcelin ( Maks- Enmbèr Marslen)
