Ayiti-Kriminalite: Ministè Enteryè yon wout legal pou kache kriminèl tout plim tout plimay.
Lapolis Nasyonal nan kad yon operasyon li mennen, vandredi 29 jiyè 2022 pase a nan zòn Debisi nan Pòtoprens pou te mete men sou yon prezime kidnapè, rate men li jouke yon akolit li epi pèmèt ajan yo sezi plizpyè materyèl ak plizyè kat prezime asasen an te konn itilize pou komèt egzaksyon li yo.
Okay, 1 dawou 2022
Nan yon piblikasyon Lapolis Nasyonal Dayiti (PNH) fè sou kont ofisyèl Fesbouk li ayè dimanch 31 jiyè 2022 a, prezante bilan yon operasyon enstitisyon an mennen vandredi pase a. Nan kad entèvansyon sa a, responsab yo anonse yo arete Manielita FLEURANTIN, ki se madanm Pierre Guintheur ki malerezman pa t nan kay la nan moman operasyon an.
Pou kounye Manielita FLEURANTIN nan gadavi ap reponn kesyon Direksyon Santral Polis Jidisyè a (DCPJ) pandan Lapolis lage yon avi rechèch dèyè prezime kriminèl la, Pierre Guintheur.
Yon fwa ankò non Sèvis Entèlijans Nasyonal (SIN) ki sou lobedyans Ministè Enteryè site nan aktivite kriminèl yo. Pami dokiman lapolis jwenn nan kay kote prezime asasen an, Pierre Guintheur ap viv la se yon kat ki prezante li kòm yon ajan Sevis Entelijans Ministè a ap pilote.
N ap raple se pa premye fwa lapolis arete oubyen endekse asasen ki nan fè gwo krim nan peyi a ki se swa ajan SIN oubyen ki okipe lòt pòs nan ministè sa a. Nou ka site Ezechiel Alexandre alyas Ze manm baz Pilat ki di li se anplwaye Ministè Enteryè, Joseph Pierre Richard Duplan Delege Depatmantal Lwès yo revoke paske non li site kòm youn nan moun kite planifye Masak Lasalin ak Fednel Monchery Ansyen direktè ministè sa a lapolis te arete paske yo te jwenn anpil endis ki moutre enplikasyon li nan move zak nan dat 13 fevriye 2021 an epi se youn nan gwo sispèk nan masak Lasalin daprè plizyè rapò enstitisyon k ap defann dwa moun nan peyi a, san bliye lapolis te arete Ladouceur Schelmer, Mendelssohn Medna, Benjy Benjamin, Ladouceur Schamyr, Jaillot Vladimyr et Wilson Maitre yon machin ki chaje gwo zam otomatik 4 mas 2022 nan zòn Tijo , yo te prezante tèt yo kòm manm SIN.
Ansyen Minis Enteryè ak Kolektivite Teritoryal Tèt Kale a, Edner Gonzague Day, te sispann tout kat idantifikasyon ajan sèvis entelijans yo nan mwa me 2021 paske yo pa t chwazi yo selon nòm yo. Men tout kat sa yo lage nan men asasen yo k ap opere san kè kase.
Nan kad operasyon sa a, lapolis anonse yo sezi nan kay la 2 chemiz ak 3 pantalon inite UDMO, 2 chemiz ak 2 pantalon polis administratif (krèm e ble), 4 senti polis, yon kepi Lapolis koulè nwa, yon zam, yon radyo kominikasyon, plizyè dizèn katouch, baton, chajè, gaz lakrimojèn, kat EDH, kat SIN, kat bankè, pèmi pou pote zam, kat ONA sou non Pierre Guintheur pou nou site sa yo sèlman. Yon veritab antrepriz kriminèl.
Nan dènye jou sa yo, PNH la montre li ta vle pran responsablite l nan demantle rezo kriminèl yo. Men li dwe pi aktif epi pran sa pi serye lè nou konnen pwoteksyon gang yo genyen bò kote anpil otorite tankou soutyen òganizasyon G9 anfanmi te jwenn nan men reprezantan Nasyonzini nan peyi a, Helen La Lime ki aplodi yo dèske yo federe.
RTM
