Ayiti-Kidnapping : 13 jou apre, Edner Décime, Jounalis Gwoup Medya Altènatif toujou nan men Kidnapè yo.
Edner Décime, jounalis Gwoup Medya Altènatif (Alter Radio ak Alter Presse) youn pami gwoup moun bandi ak zam te kidnape dimanch 17 jiyè 2022 a nan Dèlma 30, toujou nan men bandi yo malgre gwo mobilizasyon sitou sou rezo sosyal yo pou mande liberasyon li.
Okay, 29 jiyè 2022.
Depi plizyè lane ekonomi kriminèl rejim PHTK a plis chita sou kidnapping ak vant zam. Kantite moun ki kidnape ap grenpe chak jou epi yo fèt yon fason espektakilè. Jan moun yo konn di a: « bandi yo pa nan bese triye, sa yo jwenn yo pran ». Anvan se te dwòg , jounen jodi a, moun tounen machandiz. Chak tèt grenn ayisyen ki pa nan ekip la konte epi gen yon pri sou li. Sa ki banalize lavi.
Daprè plizyè òganizasyon nan mouvman sosyal ayisyen an, gen yon seri vwa depi yo pale sa pa pran tan pou viktim yo jwenn liberasyon yo. Jounalis la, Edner, nan youn nan medya ki pi entèresan nan peyi a li pa rive jwenn solidarite sa a. Yo kontinye pou di gen moun ki pa menm pase 2 èdtan nan men kidnapè yo. Se yon prèv ki montre aklè, endistri Kriminèl sa a gen mèt.
Nan youn nan atik Alter presse pibliye jedi 28 jiyè 2022 a, medya kote li ap kolabore, yo prezante konfrè jounalis la konsa : « Edner se yon jounalis ki renmen metye li, ki renmen peyi a. Li pa gen lajan , antrepriz kote l ap travay la pa gen lajan kidnapè yo mande a. Sa Edner posede se pwofesyonalis li, tan li konsakre pou mache ale jwenn peyizan yo ak pale de bèlte peyi a ». siw ta vle li atik la:https://www.alterpresse.org/spip.php?article28477
Daprè Biwo Entegre Nasyonzini an Ayiti, genyen 540 moun ki kidnape epi plis pase 780 moun ki asasinen soti janvye pou rive me 2022 pase a. Nan dènye senk (5) mwa ane 2021 an, te genyen 396 moun yo te kidnape epi 668 yo te touye. Sa ki montre kouman peyi ap viv yon sityasyon enfènal anba grif gang ki gen jouk yo nan Leta a, sektè prive a ak Kògwoup la.
Siw ta renmen li tout rapò a , klike sou lyen sa a:https://www.hrw.org/ht/news/2022/07/22/haiti-wave-violence-deepens-crisis
Nou ap raple, reprezantan nasyozini an te bat bravo lè G9 federe yo. Pou madan Lalime, reprezantant misyon onizyen an se yon bon bagay. Poutan se manm eskadwon lanmò sa yo k ap mache asasinen, kidnape sitwayen yo chak jou nan peyi a.
Franndy Lesperance
RTM
