Ayiti – Espò-. Nan jwèt Karayib la, Ayiti ap souke kò l.
Dimanch 3 jiyè 2022-. 15 jenn atlèt Ayisyen ap patisipe nan jwèt Karayib yo k ap dewoule nan Gwadloup soti premye jiyè pou bout 3 jiyè 2022 a daprè youn nan manm delegasyon Ayisyen an ki pale ak radyo Tele Montagna, maten dimanch 3 jiyè 2022 a.
Ayiti reponn prezan nan jwèt karayib la nan 3 disiplin: Jido, siklis ak Baskèt sou 7 disiplin ki nan konpetisyon an. Pou premye soti atlèt yo sa pa pi mal paske Ayiti deja gen yon meday epi klasman yo enteresan lè nou konnen kouman jenn atlèt yo ap fè fas kare ak ensekirite jeneralize a ki gen gwo enpak sou pratik espòtif yo.
Pou atlèt siklis yo sa parèt pi di. Nan premye jounen konpetisyon yo ki te fèt vandredi premye jiyè a, malgre kondisyon meteyo a pa t nan avantaj yo, yo te fé pakou a ak anpil difikilte tankou bisiklèt yo ki pa adapte pou mòd konpetisyon an pou youn manm nan ekip la men rezilta yo entèresan. Kapitèn lan, Odvelt Clergé nan kwono oubyen kont lamont fini nan 12 plas epi Fedler nan 21 tyèm plas sou 28 patisipan., Bò kote medam yo se anliy yo t ap kouri sou yon distans 66 kilomèt. Louisemène fini nan 12 zyèm plas epi Ruth Daelle fini nan 15 zyèm plas. Pou dènye jou konpitisyon an k ap lage bò 10 zè konsa maten an, se Louisemène sèlman k ap kouri nan kwono/ kont lamont epi mesye yo ak kouri anliy.
Ekip siklis la ak antrenè a soti Okay se Louiisemène Georges, Ruth Daelle Staco , Fedler Staco ak Odvelt Clergé . 3 premye atlèt yo ap kouri nan Klèb Marcel Mathieux Okay epi Odvelt k ap evolye nan Klèb Excelsior nan peyi Gwadloup . Atlèt yo akonpaye ak youn nan ansyen glwa nan siklis Okay la, Harry Staco kòm antrenè/ mekanisyen federasyon Ayisyen siklis amatè a.
Patisipe nan konpetisyon entènasyonal sa yo se yon bon mwayen pou pèfòmans atlèt yo epi ankouraje yo pou yo kontinye travay pi plis pou yo ka rekonpanse.
Nan Depatman Sid peyi a disiplin endividyèl sa a toujou kenbe. Klèb yo toujou ap òganize kèk ti konpetisyon pou kenbe siklis yo anvi malgre mankman yo. Pwochen gwo randevou k ap rive sou siklis yo se chanpyona mondyal sou wout k ap fèt nan peyi Ostrali nan mwa septanm 2022 k ap rive la.
Maks – Enmbèr Marslen
