Ayiti- Ensekirite -. Ka asasinay yo ap repete pi dri nan 3zyèm Vil peyi a.
Okay, 04 jen 2022
Vandredi 3 jen 2022 a bò 8:57 nan aswè nan lokalite Abaka, premye seksyon Komin Okay bandi ame moun pa rive idantifye vide atè yon jenn gason ki pote non Nelson Terry, alyas Gran Black.
Selon enfòmasyon nou radyo Télé Montagna ka fè konfyans, jenn gason 33 lane a, Nelson Terry se moun nan zòn lan. Li t ap antre lakay li lè bandi yo asasinen li ak 3 bal ki touye sou plas. Viktim lan se yon chofè kamyon baskil, li mouri kite madam ak yon pitit gason.
Apre Konsta legal kote yon jwenn tout bagay sou viktim lan, jijdepè a ki te akonpaye ak SDPJ ak ajan UDMO/Sid yo, te otorize paran viktim lan leve kadav la epi remèt li bay yon mòg prive nan vil la bò 11zè konsa nan aswè. Yon lòtbò, pou yon sitwayen ki reponn kesyon nou, li plis wè nan zak sa yon regleman kont. Bandi yo fin tire l epi yo pati san yo pa pran anyen sou li. Li kalifye zak la, yon zak lach.
Aksyon kriminèl yo sanble ap ògmante nan komin Okay la anpatikilye, Depatman Sid la anjeneral. Sèl semenn sa a, RTM anrejistre plizyè ka kote sitwayen yo mouri oubyen blese anba bal bandi.
Lapolis dwe monte gad li, miltipliye patwouy li yo pou vit fwennen sitiyasyon sa a k ap pran chè nan Depatman Sid la.https://radiotelemontagna.com/ayiti-ensekirite-popilassyon-an-sou-wout-ayewopo-okay-la-leve-jwenn-yon-moun-mouri-boule/
Maks – Enmbèr Marslen
