Ayiti-Enpinite: Plizyè dizèn moun mache nan twazyèm Vil peyi a pou di ak Komisè Richemond, ka Grégory Oscar a p ap mouri nan tiwa lajistis.
21 jou aprè yo te fin asasinen l, fanmi ak zanmi kou kèk sitwayen mache, maten madi 28 jen 2022 a pou mande lajistis leve pye l pou arete epi jije tout moun ki enplike nan lanmò Grégory Oscar.
Okay, 28 jen 2022
Bouke flè, 2 banbwòl, plizyè pankat nan men yo, sitwayen pwotestatè yo ap mande jistis pou Pouchon, arete tout moun non yo site, arete polisye egzekitè a; Jistis pou Pouchon rezo vòlè tè Okay ak Lapolis asasinen pou pwòp byen li a»… Pwotestatè yo te reyini nan kwa 4 Chemen an ak yon ti kamyonèt son, bò 9vè konsa. Yo lonje desann boulva a, vire adwat antre nan ri Gosen kote yo depoze bouke flè a nan lye Grégory Oscar te asasinen an ak plizyè bal anvan yo te pouswiv wout yo pou rive douvan pakè Okay la kote yo delivre yon mesaj bay jal Komisè jiridiksyon an, Ronald Richemond ki te parèt sou balkon pakè a akonpaye ak kèk manm ekip li, abiye annwa, ame jouk nan dan.
Pou manifestan yo se Ronald Richemond ki pouse sitwayen yo asasine Grégory Oscar ak deklarasyon iresponsab li a. Nèg sou moto te pouswiv viktim lan , sot Charye, 2zyèm seksyon komin Okay, ap rele bare bandi jouk pou vin asasinen li la bò sant sante a, 2 pa ak lakay li. Olye Komisè ate di sitwayen kenbe prezime bandi yo epi rele l men li te di pito nan matyè flagrans tout òm se polis. Si yon vin atake w ou wè yo, ou ka mete yo atè se fè l epi rele l vin fè konsta. Pou non avoka yo menm ki gentan mawon an se Komisè a menm ki lakòz. Lajistis pa fèt nan radyo. Lè Komisè a, mèkredi 8 jen 2022 pase a site non avoka parèy li yo nan konferans pou laprès olye te aji ansilans se yon fason pou l te di yo sove. Se yon lòt fason pakè itilize pou l kontinye pwoteje avoka yo.
Depi aprè pakè Okay la te fin mete manda dèyè youn nan sispèk yo, Haby Fabre, te lonje dwèt sou kèk polisye – yon aksyon direktè pnh/Sid la te voye jeté byen lwen – anyen pa bouje anplis. Daprè fanmi viktim lan ki pale ak nou ta fè kwè kò Oscar nan yon mòg nan kapital la. Okenn moun pa arete epi yo pa okouran Komisè a transfere dosye a bay yon jij enstriktè.
Kontakte jal Komisè an pou nou konnen ki di plis ki gen sou dosye a, telefòn li sonnen san repons epi li pa reponn mesaj watsap RTM te voye ba li.
Yon lòt kote zak ensekirite yo ap kannale monte nan 3zyèm vil peyi a. Lendi 27 jen 2022 pase a, nèg ame sou moto atake yon machin nan ri Jeneral Maryon blòk simityè a epi blese 2 moun. Lavi viktim yo pa andanje, y ap kontinye pran swen nan yon lopital nan vil la.
Se chak jou bandi yo ap atake sitwayen yo. Lè se pa brakaj, vòlè moto, se blese kou touye yo anba bal nan komin Okay ak ozalantou l. Malgre patwouy mobil Lapolis yo sanble ap vin pi dri men sa pako dekouraje bandi yo nan egzaksyon yo. Menm lè sistèm jistis la pouri sitwayen yo ret kwè nan yon ti lòsyè jistis bò kote otorite yo.
Maks – Enmbèr Marslen
