Ayiti /Edikasyon -. Plizyè milye kandida nan premye faz egzamen leta yo pran wout diferan sant egzamen nan peyi a.
Okay, 20 jen 2022
Semenn lendi 20 jen 2022 a, premye pati egzamen Leta yo pou elèv 9vyèm AF, Lekòl Nòmal Enstititè/ Kapis kou Lekòl Sant Edikasyon Familyal yo demare nan tout peyi a, Vil Okay anpatikilye, daprè konsta radyo Télé Montagna.
Elèv 9vyèm AF yo ap konpoze soti 20 pou rive 22 jen 2022 a, Sant Edikasyon Familyal yo kou elèv Nòmal yo bò kote pa yo se lendi 20 jen an pou jedi 24 jen 2022 a epi premye jiyè pou 6 jiyè 2022 k ap rive la se pral 2zyèm pati egzamen ofisyèl bakaloreya a oubyen fen etid klasik pou elèv Nouvo Segondè yo ( NS4).
Minis Edikasyon Nasyonal ak Fòmasyon Pwofesyonèl la, Nesmy Manigat, di li mete tout bagay anplas, li ret pou l swete timoun yo patisipe nan egzamen ofisyèl yo ak kè poze. Pou MENFP a, egzamen yo se yon mobilizasyon sitwayèn. Pa dwe gen yjng yang. Genyen yon total 930 sant k ap resevwa kandida yo ki soti nan plis pase 7491 lekòl anmajorite prive. Poutan elèv nan Tosèl, Taba, Kwadèboukè bloke lakay yo pou premye jou egzamen Leta yo, akòz gwoup gang ame ki chwazi simen laterè pandan dewoulman premye jou egzamen yo.
Pou tout peyi a se yon total 201,280 kandida 9vyèm Ane Fondamantal k ap sibi egzamen yo nan tout peyi a. Depatman ki gen plis elèv la se Lwès. Kapital la gen 88,837 kandida epi rejyòn ki gen pi piti a se Grandans ak yon total 6,764 epi depatman Sid la se 11,220 k ap konpoze. Pou Lekòl Nòmal Enstititè (ENI) yo se 2,547 kandida pou tout peyi a ladan yo 120 pou Sid ak pou Sant Edikasyon Familyal yo se 503 kandida pou 7 depatman, ladan yo 52 pou depatman Sid la.
Pou kèk distri eskolè nan kapital la tankou Taba , Kwadèboukè, Matisan,Lasalin lekòl la te anpandyòs. Pou Matisan an menm se mwa pase a ministè a t ap klewonnen timoun yo tounen nan sal klas yo poutan bandi yo te toujou ap simaye bal anpeche yo swiv kou kòmsadwa. Kòm nou pa tande ki desizyon ministè a pran pou timoun sa yo se sèten yo nan sal egzamen si yo ka rive pase.
Lane eskokè 2021 – 2022 a pa te twò pètibe nan kesyon politik jan sa konnen ye. Men nan gransid peyi a se madoulè tranblemantè 14 dawou 2021 pase a kou pil lòt sekous aprè yo ki make lavi eskolè a, lòt kote se flewo ensekite a ki lakòz anpil timoun pa ka jwi dwa konstitisyonèl sa a kou pil lòt paske mòd Leta ki anplas la p ap travay pou sa. Konpoze se youn men gwo lo a se reyisit la paran yo ap tann pou pèmèt sèten kontinye epi pou anpil lòt lage nan lari a ògmante depèdisyon eskolè.
Maks – Enmbèr Marslen
