Ayiti-Edikasyon: Malgre sitiyasyon aprantisaj la te malouk, plizyè jenn medam jwenn fòs pou yo boukle etap yo.
Okay 25 Jen 2022
Youn nan 3 kategori egzamen ofisyèl yo klotire 2zyèm faz egzamen yo pou elèv nan Sant Edikatif Familyal yo (CEF). Daprè konsta Radyo Télé Montagna fè vandredi 24 dawou 2022 a bò 5 kè nan apremidi konsa nan Vil Okay.
Si pou elèv 9AF yo se depi mèkredi 22 jen pase a egzamen ofisyèl yo bout, pou elèv nan lekòl Nòmal yo ak Sant Edikatif Familyal yo se vandredi 24 jen 2022 a egzamen yo pran fen nan tout peyi a.
Nan 503 kandida ki sibi egzamen ofisyèl yo nan 7 depatman jewografik peyi a, depatman Sid la gen 45 sou 52 ki sibi eprèv yo nan yon sèl syèj ki tabli kò l nan lokal « Lekòl Nasyonal Dumarsais Estimé a. »Li te gen 2 sal egzamen.
Plizyè elèv SEF ki reponn kesyon RTM di yo kontan, yo gen yon metye aprè 3 lane etid. Nan diferan 5 sant k ap fonksyone nan depatman yo, yo aprann kouti, bwode, atizana ak patisri.
Akote detèminasyon yo pou te aprann metye a, yo te fè fas kare ak gwo pwoblèm ki mande pou Ministè Edikasyon Nasyonal ak Fòmasyom Pwofesyonèl la aji vit sou yo. Nan diferan sant fòmasyon yo, Sant Senlwi Disid, Kanperen, Loran, Kavayon ak Okay pwoblèm yo pa twò diferan daprè finisan yo ak responsab yo. Tout di sant yo pa ekipe. Si youn gen espas pou yo travay, se ka Sant Edikatif Familyal lekòl Nasyonal Dumarsais Estimé a ki fè pati lekòl la menm, li manke materyèl. Aprenan yo jwenn kèk grenn machin pou 20 elèv. Yo gen 2 fou, youn ladan yo pa fin kòdyòm, pa gen refrijeratè(Frijidè), papye, elatriye.
Pou SEF nan komin Kanperen an se nan kolèj Immaculée Conception an Sant lan ap fonksyone. Bezwen nou yo di jenn medam yo anpil. Selon youn nan jenn fi yo, gen lokal , men san sal travay kay mè yo,se anba yon pyebwa fòmasyon yo t ap fèt, pa mande pou materyèl. Depi gen move tan, Sant lan pa fonksyone. Yo swete ministè levasyon nasyonal la voye je gade yo sinon sant lan ap kanpe ede yo nan komin lan. Gen lòt sant menm tankou Senlwi Disid se alamen medam yo aprann koud. Pwent dwèt yo fin manje ak pwent zegwi. Pou yo konn pedale machin akoud se patikilye ki ede yo.
Plizyè monitris ki pale ak nou di. Depatman an te gen 13 Sant Edikatif Familyal Leta te mete kanpe. Kantite a piti men olye li ta ògmante se pito 8 ki fèmen paske pa gen monitè ladan yo. Leta pa nonmen lòt gid ladan yo epi materyèl ki pa genyen fè jenn nan kominote yo pa frekante sant sa yo. Lè Leta gade yo se lè gen egzamen ofisyèl. yo swete sitiyasyon sa a chanje.
Daprè sipèvizè depatman an, Marie Arnèse Almeda, se 5 sant familyal depatman an k ap fonksyone sou 13 sant Leta genyen yo. Pou responsab la, pwoblèm yo anpil men pi gwo yo sèke Sant yo pa ekipe epi pa gen monitè pou fè lòt yo fonksyone. Sipèvizèz la di fòmasyon jenn fanm ak gason sa yo chita sou 3 nivo konpetans fondamantal: konpetans debaz yo (li ak ekri); konpetans pwofesyonèl ( yon metye) ak sou lavi.
Egzamen an dewoule sou 2 aspè: tewori ak pratik. Elèv yo boukle sik etid la, se byen men se ak lapenn l ap voye jenn sa yo ale paske fòmasyon yo te dwe pi solid. Lè l gade matonton travay medam yo reyalize li di tèt li, detèminasyon se pi gwo zam pou chak sitwayen genyen.
Direktris lekòl nasyonal Dimasè Estime a ak Sant lan, Carline Mondesir ale nan menm sans lan tou. Li swete jwenn plis sipò pou Sant lan fonksyone pi byen. Li ap tann plis materyèl antre nan Sant la tankou: machin, fou, frijidè ak lokal la ki bezwen plis sekirize. Yo swete misnistè levasyon nasyonal la voye je gade yo.
Jenn medam yo te jwenn sipò plizyè kad nan direksyon Depatmantal MENFP a kote Direktè ai a, Jean Sylvain Desir, enspektè te vin asiste yo nan fen egzamen yo.
Ministè a nan sig li a fè kwè l ap Kore fòmasyon pwofesyonèl. Men li klè pou jan lekòl ak plizyè vitès la ap kouri a, li lage plizyè milye timoun nan wout. Bay yo yon metye se t ap pi bon mwayen pou ede yo fè fas kare ak lavi a.
Maks- Enmbèr Marslen
