Ayè mèkredi 9 oktòb 2024 la, plizyè nèg ame ak kagoul nan tèt yo panike moun ki te sou premye gran ri Okay ant ri Duvivier Hall ak Prospère Faure lè yo brake yon depo bal pèpè, Dany Store, bò 4trè konsa nan aprèmidi.
Okay, jedi 10 oktòb 2024
Yo te 5, mas nan tèt yo ki antre nan depo bal pèpè a, fè tout moun kouche, malmennen youn nan responsab yo, kase tèt li ak kout zam epi pati ak lajan vant jounen an.
Nan soti, vòlè ame yo te tonbe tire, panike moun ki te nan famasi kou lòt biznis sou premye gran ri a. Malgre zak sa yo pa sispann repete nan ri Nicolas Geffrard a men Lapolis pa fè plis pou kontrekare bandi yo. Nou ap raple, omwen gen 4 moun pou pipiti, kriminèl asasinen nan 2 dènye lane sa yo nan ti bout ri sa.
Aprè brakaj la, kriminèl yo , fyè ap mache anba galri kay yo, pran 2 moto epi kite zòn lan san enkyetid selon enfòmasyon kèk temwen ki reponn kesyon sal nouvèl Radyo Montagna. Ta sanble te gen 2 ajan polis ansivil ki te oblije kache olye yo te fè yon reyaksyon.
Si nou kwè enfòmasyon yo, se menm bandı ame sa yo nan kouri pou kite sant vil la, mwens 100 mèt ak lye fòfe a, louvri bal kote jenn atlèt pwalou, Reginald Berlus aka Tireji blese. Viktim 30 lane konsa a te pral rann dènye souf li nan lopital Ofatma Okay.
Nan dènye jou sa yo, zak brakaj espektakilè yo pa sispann ògmante nan komin Okay la ak ozalantou l. Malgre otorite nan Pakè Okay la, Lameri Okay, Delegasyon Sid ajoute ak kò legal Lapolis kou BESAP ap bat lestomak yo nan tab sekirite komin lan men bandı yo alèz pou atake sitwayen yo lajounen kou nan nwit.
Max – Imbert Marcelin ( Maks – Enmbèr Marslen)
RTM
