Jan sa te anonse depi nan dimanch 10 novanm 2024 la ak yon kopi premye paj jounal ofisyèl peyi a ki t ap sikile, yon nouvo Premye Minis defakto pran mayèt la.
Okay 11 novanm 2024
Nan yon arete ki pran lari depi dimanch 10 novanm 2024 la epi ki gen siyati 8/9 manm KPT a, Alix Didier Fils- Aimé nonmen kòm nouvo Premye Minis.
Bizisman Alix Didier Fils-Aimé ranplase ansyen Premye Minis defakto Garry Conille ki te pran fonksyon, lendi 3 me 2024 la. Nan arete sa a, se 8 sou 9 manm KPT a, awotan konseye Prezidan Edgard Leblanc Fils ki siyen arete sa a ki nonmen sitwayen Alix Didier Fils- Aimé nouvo Premye Minis defakto. Yon nominasyon Garry Conille konteste epi te jwe pou te anpeche nouvo PM nan antre nan viladakèy la. Kisa ki te atache l konsa ak pòs la?
Nan diskou sikonstans lan, kodonatè konsèy KPT a, Lesly Voltaire deklare, lè pwopagann lan fini kou bay manti pou kalifye aksyon ansyen PM defakto a. Nouvo PM lan sou bò pa li deklare se sou eta sekirite a ak reyalize eleksyon nan peyi a ki veritab misyon l.
Yon lòt kote, byen bonè maten lendi 11 novanm 2024 sa, eskadwon lanmò yo te sou pyedegè yo nan kapital la. Yo boule moun, kay, vòlè epi tire sou konpayi avyon Spirit ki te pral plane sou pis ayewopò Tousen Louvèti a. Si bal yo te touche zòn sansib aparèy la, se t ap yon gwo katastwòf nan peyi a menmsi nouvèl yo ta fè kwè gen youn nan manm ekipaj konpayi etazinyen an ki ta soti blese. Kòm konsekans, okenn vòl komesyal lokal kou entènasyonal, kago kanpe nan peyi a. Avyon sila a te oblite al alteri nan peyi vwazen an.
Egzaksyon kriminèl yo pouse anpil moun ap poze kesyon epi lonje dwèt sou gwo dinozò politisyen, omdafè makawon ayè kou lajounen. Fòs k ap tire sou kòd ensekirite planifye a andedan kou deyò peyi a. Misyon yo se fini ak peyi a tout jan.
Maks – Enmbèr Marslen
RTM
Foto pak facebook « Présidence d’Haiti »
