Prezidan Komisyon Kominal Okay la ki te patisipe nan emisyon « Kiyè Bwa », dimanch 3 novanm 2024 la, eksprime satisfaksyon li pou jan komisyon an ap administre komin lan depi 14 mwa yo gen nan tèt enstitisyon lokal sa.
Okay, vandredi 8 novanm 2024.
Ak anpil Konfyans, Claire Daphné FRANCE reponn jounalis yo nan radyo Hirondelle ak Montagna. Nan entèvansyon li a, li te plis apiye sou fason komisyon an ap administre komin lan nan sa ki gen awè ak kesyon sekirite sitwayen yo nan divès nivo.
Majistra defakto a di, sante finansyè meri a pa bon paske lakomin pa antre lajan nan men kontribiyab ki vle peye patant, CFPB… kòmsadwa. Meri a nan tèt piramid la se vre. Men lòt patenè yo tankou: Lapolis, MTPTK, MDE … dwe pote kole. Se ansanm enstitisyon yo dwe mache. Meri a paka fè tout bagay san lòt yo.
Daprè li, si Direksyon Jeneral Enpo (DGI) nan Okay t ap byen fonksyone sa t ap pèmèt asyèt fiskal Lameri pi gra pou yo te ka jwenn plis mwayen pou yo peye anplwaye meri a nan divès sèvis atan pou ka gen plis randman epi evite koze koripsyon. Men nan kesyon taks dirèk yo, (resèt entèn yo) Prezidan an pa t abòde yo.
Alè aktyèl, meri a pa dwe okenn anplwaye sou dènyè lane fiskal la epi li tou pwofite bat bravo paske se premye fwa meri a bay anplwaye yo boni. Sa se yon eskandal!
Pou kesyon ranmase fatra epi kenbe vil la pwòp, Ajan egzekitif la pwomèt li pral ògmante kantite machin nan sèvis vwari a ak sipò patenè l « URBAYİTİ » epi mete yon kalandriye deyò yon fason pou sitwayen yo ka konnen kilè, ki jou kamyon fatra a ap pase nan ri yo san di kouman aksyon sa a ap rive jwenn sitwayen yo ki nan 6 seksyon kominal sant vil Okay la.
Politik la, Majistra FRANCE ta vle mete l sou kote pou anbrase pito aspè administratif Lakomin lan. Men, pouki nan kesyon aplikasyon « Arete Kominal » nan fen mwa sektanm 2024 pase a, sitwayen yo poko santi pwa matonton dokiman legal sa a nan sa ki gen pou wè ak aplikasyon l pou jan kèk zòn ta dwe pwoteje kou pou kèk kominote ka jwenn repo lespri yo pa rapò ak kèk pwojè bidon Lameri te gentan sanksyone men ki rete debou?
Pou kesyon tè kay Jano, mache Jedi, san di l, Lameri ta swete timachann yo kou pwopriyetè konntenè yo òganize yo detan l ap tann eritye yo depoze papye yo pou montre dwa ak kalite yo men tou di yo sa Leta depanse, mache a p ap deplase.
Sa gen 12 lane konsa depi lameri te mete mache a kou konntrnè yo la. Men sa gen plis pase yon lane depi espas la ap lote kote non jij, otorite, avoka, gwo komèsan pa sispann site k ap lote tè sa lajounen kou nan nwit ak gwo mwayen.
Toupatou nan peyi a, li ra konsèy kou komisyon Minisipal ki rann piblik rapò administrasyon kominal yo. Èske komisyon sa a pral pran wout sa epi plakade l? Nou ap ret tann nan fen lane 2024 la pou n wè si ap gen repons.
Maks – Enmbèr Marslen
RTM
