3 moun ale nan dlo, plizyè tèt bèt disparèt, anpil kay, jaden kou zòn inonde nan divès komin depatman Sid la soti lendi 11 pou bout mèkredi 13 novanm 2024 la, selon rapò, radyo Montagna gen yon kopi, Direksyon Depatman Sid Pwoteksyon Sivil mete deyò sou pasaj move tan sa a.
Okay 13 novanm 2024
Yon jou aprè pasaj move tan an ki te lakòz anpil lapli sou tout 20 komin depatman Sid la chif yo koumanse parèt sou dega lapli a lakòz. Daprè rapò sa a, se komin Okay, Tòbèk ak Pòtapiman ki ta plis touche ak pasaj ond twopikal sa a ki te lokalize nan lanmè karayib la ki te lakòz tout rivyè depatman Sid la te desann.
Selon enfòmasyon yo ki pa prezante nan rapò Pwoteksyon Sivil la, gen 3 moun dlo pote ale nan Okay, zile Ilavach ak Pòtapiman. Pou kay ki inonde menm, Pwoteksyon Sivil fè eta plizyè santèn kay, ri kou zòn nan 3zyèm vil peyi a tankou Dèyèfò, Pon Gonbo, pon Sant, kafou Orel, pon Salomon kou wout prensipal Tòbèk la ki te anba dlo oubyen lòt ki konekte komin yo te chaje ak debri, sab, elatriye.
Nan seksyon kominal vil yo menm, dlo a ap dòmi nan anpil jaden mayi, pistach, pwa Kongo, kou pepinyè legim. Dlo sa yo ki kouche nan jaden ka touye danre yo oubyen fòse peyizan rekòltè yo anvan lè.
Pou lajounen mèkredi 13 novanm 2024 la, anpil ri nan sant vil Okay toujou chaje ak dlo ki anpeche sitwayen yo sikile. Nan mwatye jounen an, RTM konstate Lameri Okay ak Direksyon Sid – Travay Piblik Transpò ak Kominikasyon (TPTK) ap netwaye kèk rigòl pou dlo a ta koule pi vit.
Topografi vil la difisil daprè yon enjenyè ki reponn kesyon radyo Montagna epi lanmè a preske nan menm nivo ak sant vil la.
Pou egzitwa yo, vil la te gen 3 egzitwa natirèl: youn nan zòn ki te rele Mowo oswa nan Tkòk kou nan Palmis – zòn Latoutrèl, lòt la nan zòn Dèyèfò epi dènyè a nan pwent ri Antwàn Simon. Men nan 25 dènye lane sa yo fason kèk kay ap monte nan kèk kote redui yo. Se ka baz « Gade Côtes » nan ma bò Reno a. Gen lòt kote menm, konstriksyon yo anpeche dlo a koule pou rive nan egzitwa natirèl sa yo.
Vil la te plen bim yo nan kèk tè makay ki te yon eponj. Bim sa yo fin disparèt, nou swete pou sèvis ibanis nan Lameri Okay la jwe wòl li nan anpeche moun al kontinye ranbleye zòn eponj sa yo.
Rezoud pwoblèm dlo nan vil la mande volonte. Se pou Lameri ak TPTK, daprè pwofesyonèl la chache pete kote ki dwe pete pou dlo a ka koule epi lage yon kanpay sanbilizasyon sou jesyon fatra nan kominote yo.
Malgre otorite yo konnen nou nan epòk siklonik epi dezòd klimatik la se yon reyalite, yo pa pran desizyon yo atan pou netwaye rigol ak fose yo, yon pa epi kalite travay k ap kontinye fèt nan betone plizyè ri nan sant vil pa reponn ak reyalite a lakòz kèk grenn lapli sifi pou inonde anpil zòn.
Maks – Enmbèr Marslen
RTM
